ESPAGNE : Kwigenga kwa Catalogna gukomeje kwamaganwa

Kuri iki cyumweru abantu benshi bahuriye mu mujyi wa Barcelona mu myigaragambyo yo kwamagana gahunda zo guha ubwigenge intara ya Catalogna.

Iyi myigaragambyo ibaye nyuma y’icyumweru habaye kamarampaka ku bwigenge bw’iyo ntara yakuruye impaka zitoroshye. Abahamagaje iyi myigaragambyo baravuga ko bahagarariye rubanda nyamwishi rudashaka ko Espagne icikamo ibice.

BBC yatangaje ko abategetsi b’intara ya Catalogna biyemerera ko umubare uri munsi ya kimwe cya kabiri cy’abantu bemerewe gutora aribo batoye muri iyo kamarampaka.

Ibyayivuyemo byerekanye ko bashaka ko iyo ntara yigenga, icyakora urukiko rw’ikirenga rw’ubwami bwa Espagne rwatesheje agaciro iyi kamarampaka, rushingiye ku kuba itegekonshinga ry’iki gihugu ritabyemera.

Inteko nshingamategeko ya Catalogna irateganya kwiga kuri icyo kibazo kuwa kabiri. Leta ya Espagne yaburiye ubuyobozi bwa Catalogna ko idashobora kwemera ubwigenge bwayo .