Dakar : Paul Kagame yasabye ibihugu bya Afurika gushyira hamwe

Dakar : Paul Kagame yasabye ibihugu bya Afurika gushyira hamwe

Perezida wa Repubulika Paul Kagame ari I Dakar muri Senegal, aho yitabiriye inama y’ ihuriro mpuzamahanga rya Dakar ryiga ryiga ku bibazo by’ amahoro n’ umutekano.

Muri yo nama Parezida Kagame yatanze ikiganiro cyibanze ku buryo ibihugu bya Afurika byashyira hamwe mu kwikemurira ibibazo.

Nk’ uko bigaragara ku rukuta rwa twitter rw’ ibiro by’ umukuru w’ igihugu, perezida wa Repubulika y’ u Rwanda Paul Kagame yatanze ikiganiro, mu nama y’ ihuriro mpuzamahanga rya Dakar, ryiga ku bibazo by’ amahoro n’ umutekano (Dakar International Forum on Peace and Security), atangira ashimira abafatanyabikorwa bagize uruhare mu kuyitegura, by’ umwihariko Perezida wa Senegar Macky Sall, wayakiriye.

Perezida Paul Kagame yavuze ko ibibazo by’ umutekano bigaragara kuri uyu mugabane, ahanini biterwa no kudakorera hamwe. Maze asaba ko yaba ibihugu bifite ibibazo n’ ibitabifite, byakorana kugira ngo ibyo bibazo bidakwirakwira n’ aho bitari.

Umukuru w’igihugu cy’ u Rwanda yagaragaje ko ukutajegajega kw’ ibihugu bya Afurika kwakubakira ku cyizere no kongera umusaruro, abaturage bose bagiramo inyungu, dore ko ngo ari ukuri gushingiye ku bunararibonye u Rwanda rufite.

Yashimangiye ko ukuri gushingiye kuri politiki idaheza abaturage n’ inzego z’ abikorere ariko gutanga umusaruro, asaba ko abanyafurika kutemerera abaturuka hanze y’ uyu mugabane, gusobanura ibibazo ufite no kubiwukemurira.

Ariko perezida Paul Kagame yanasobanuye ko ubumwe bwa Afurika no kwikemurira ibibazo avuga, bidahakana akamaro k’umusaruro uturuka mu gukorana n’ abafatanyabikorwa bava hanze y’Afurika. Bityo ngo, Afurika igomba gufata iya mbere mu kwikemurira ibibazo, abafatanyabikorwa bakaza nyuma.

Ku mugoroba wo ku cyumweru taliki ya 12/11 ni bwo umukuru w’ igihugu Paul Kagame, yageze I Dakar muri Senegal, yitabiriye inama y’ ihuriro mpuzamahanga rya Dakar, rifite insanganyamatsiko ivuga ku bibazo bibangamiye umutekano wa Afurika n’ uko ibihugu byafatikanya mu kubishakira umuti.

Usibye perezida wa Senegal Macky Sall, Iyi nama y’ iminsi ibiri, yanitabiriwe na perezida wa Mali, Ibrahim Boubacar Keïta, chairman wa Komisiyo ya Afurika yunze ubumwe, Mousa Faki, na Minisitiri w’ Intebe wa Chad, Albert Pahimi Padacké.

Muri rusange abitabiriye iyi nama babarirwa muri 400, bafite ubunararibonye muri politike mpuzamahanga, mu miyoborere y’igisirikare.

Harimo kandi abarimu mu ma kaminuza yo muri Afurika yunze Ubumwe, impuguke zo mu Muryango wunze Ubumwe w’Ibihugu by’Iburayi(EU), impuguke zo mu Muryango w’Abibumbye, n’abagize sosiyete.

Ihuriro mpuzamahanga rya Dakar ryiga ku bibazo by’amahoro n’umutekano ryatangiye muri 2014.