Amazing Grace Christian Radio igiye kuba ihagaritswe

Bitewe n’amagambo asebya abagore na Kiliziya Gatorika yavuzwen’umuvugabutumwa, Nicolas Niyibikora, radio yavugiyeho aya magambo, Amazing Grace Christian Radio yasabiwe gufungwa by’agateganyo n’urwego rw’abanyamakuru bigenzura RMC.

Nyuma yuko Impuzamiryango iharanira uburenganzira bw’abagore, Pro-Femme Twese Hamwe igejeje ikirego ku RMC, uru rwego na rwo rwahise rusaba Urwego ngenzuramikorere (RURA) kuba Amazing Grace yaba ihagaritswe by’agateganyo.

RMC yategetse Niyibikora gusaba imbabazi Abanyarwanda bose n’abagore by’umwihariko mu gihe kitarenze amasaha 48, hashingiwe ku ngingo ya 30 n’iya 31 mu mategeko ngengamyitwarire agenga umuwuga w’itangazamakuru, inategeka ko RURA yaba ihagaritse Amazing Grace Christian Radio by’agateganyo mu gihe cy’amezi atatu ndetse nayo ikandika ibaruwa isaba imbabazi Abanyarwanda mu gihe kitarenze amasaha 48.

Ngo kuba iyi radio itagira umuyobozi w’ibiganiro ubasha kumva ibivugirwa kuri iyo radiyo mu ndimi zikoreshwaho, ikaba inavugwaho imikorere itanoze, ni zimwe mu mpamvu zishyirwa mu majwi ku ifungwa ry’iyi radio.

Ku wa 29 Mutarama 2018, nibwo Niyibikora yumvikanye kuri Radio Amazing Grace yigishaga avuga ko nta cyiza cy’umugore.

Yagize ati “Ikibazo abagore bafite uyu munsi ni uko babaye indaya, reka rero nze mbabwire umugore uko agaragara imbere y’Imana. Icya mbere afitanye ikibazo n’Imana […] Isi ya mbere ijya kurimbuka abagore babigizemo uruhare. Icyiza cy’umugore ni iki ? Wakivana he ? Aburahamu ananirwa guhamya Imana mu Misiri, uwamugiriye inama yo kwicecekera si umugore ? Wicare uzi ngo Imana ifitanye ikibazo n’umugore ndetse n’amatorero.”

Yakomeje agira ati “Aburahamu ajya kwisohoreza amasezerano uwamugiriye inama ngo anyuranye na gahunda y’Uwiteka si umugore ? Umugore mwebwe muramwitiranya. Umugore ni mubi noneho mbivuge. Umugore ni mubi adindiza gahunda z’Uwiteka […] wagiye wumva neza ububi bw’umugore.”

Ubutumwa bwe bwanumvikanishije ko Itorero rifashe ukuri rikavanga n’ibinyoma ryitwa maraya, rikajya ku murongo wa Kiliziya Gatolika.

Inzego z’abagore ni zo zahise zihagurukira kwamagana uwo muvugabutumwa ndetse Pro-Femmes Twese Hamwe inarega radiyo yigishirijeho.

Ubwo yasobanuraga impamvu batanze icyo kirego muri RMC, Umuyobozi wa Pro-Femmes Twese Hamwe, Kanakuze Jeanne D’Arc, yavuze ko bafashe icyemezo cyo kugeza radiyo kuri RMC kuko ngo abayobozi bayo bemeye ko hanyuzwaho ibiganiro bitesha agaciro umugore w’Umunyarwandakazi.

Yagize ati “ Ku wa 29 Mutarama kuri Radio Amazing Grace hanyuze ikiganiro cyaje ari inshamugongo, ari rutwitsi, iyo ugiteze amatwi ukagisesengura, ibigikubiyemo ni ibintu bipfobya umugore. Bikibutsa ibintu bikomeye byabaye muri iki gihugu mu gihe cya Jenoside yakorewe Abatutsi igihe itangazamakuru ryabaga ryibasiye igice cy’abantu.”

Umuyobozi wa Radio Amasing Grace, Gregg Schoof, wabanje kuvuga ko atazi neza ibyavugiwe kuri radiyo ye kuko ngo byavuzwe mu Kinyarwanda kandi atacyumva, yavuze ko akeneye igihe kirambuye cyo kubisoma kugira ngo abisobanukirwe kuko bamaze kubimushyirira mu Cyongereza.

Gusa yavuze ko muri bike yari amaze gusoma yasanze Umuvugabutumwa yaravuze ibintu bibi ndetse yongeraho ko yitandukanyije nawe.

Yagize ati “ Nasomye hafi nka kimwe cya kabiri cyabyo bari bamaze kunshyirira mu Cyongereza, gusa nanjye sinshigikiye umuntu utesha agaciro abagore, mpamya ko umukirisito nyakuri adashobora kuvuga nabi abagore ahubwo arabarinda.”

Nyuma y’imyanzuro yafashwe, Kanakuze wo muri Pro-Femmes Twese Hamwe yavuze ko banyuzwe n’imyanzuro yafatiwe Umuvugabutumwa Nicolas na radiyo yamuhaye urubuga rwo kuvugiraho ibibangamira umugore.

Ati “ Ikidushimishije kurushaho ni uko imbabazi azisaba Abanyarwanda ndetse na radiyo yamuhaye umwanya igasabirwa guhagarikwa amezi atatu, twebwe turabona bitunyuze , biratuma iriya radiyo yumva ko ibintu bitoroshye, Abanyarwanda batakwemera umuntu wese ubiba inzangano, upfobya ndetse n’ugira ivangura iryo ari ryo ryose.”

Umuvugabutumwa Nicolas ntiyagaragaye muri uru rubanza rwo muri RMC, ngo yahamagaye kuri telefoni ye ntiyaboneka.

Yisangize Inshuti.

Ibitekerezo

Tanga Igitekerezo