Abatorotse mu mikino ya Commonwealth bari gukurikiranwa-Amb.Nduhungire

Minisiteri y’ububanyi n’amahanga y’u Rwanda iravuga ko igikomeje gushakisha amakuru y’impamo kuri bamwe mu banyarwanda bivugwa ko batorotse aho bari bitabiriye imikino ihuza ibihugu bikoresha ururimi rw’icyongereza common wealth iri kubera mu gihugu cya Australia.

Iyi Minisiteri isobanura ko iri mu biganiro n’igihugu cya Australia, ngo ikazafata umwanzuro imaze kubona amakuru yizewe.

Minisiteri y’ububanyi n’amahanga y’u Rwanda, ntihakana amakuru ku banyarwanda bivugwa ko batorotse, aho bari muri Australia mu mikino ihuza ibihugu bikoresha ururimi rw’icyongereza, nkuko Amb.Olivier Nduhungirehe, umunyamabanga wa leta muri iyi Minisiteri abisobanura.

Ati ”Turagikurikirana ariko ntabwo turamenya amakuru ahagije, ubungubu inzego zibishinzwe zirimo ziragikurikirana”.

Ntiharamenyekana neza igihe bizafata kugira ngo iyi Minisiteri y’ububanyi n’amahanga y’u Rwanda ibe yabonye amakuru mpamo ku banyarwanda bivugwa ko batorotse.

Nubwo bitaramenyekana neza igihe bizafata iyi Minisiteri ngo ibe yabonye amakuru afatika, Ambasaderi Nduhungirehe wirinze kwemeza niba baratorotse koko cyangwa barashimuswe, avuga ko hari icyo u Rwanda ruri gukora ngo rubone amakuru ya nyayo.

Ati ”Amakuru ntabwo ahagije, tuzakomeza iperereza inzego zibishinzwe zirimo zirabikurikirana, ubwo tuzabimenya mu minsi iri imbere, tuzafata ibyemezo bikwiye amakuru namenyekana kuko ubu ntabwo ahamye”.

U Rwanda ruhagarariwe n’abagera kuri 22 barimo abakinnyi 17 n’abatoza batanu.

Umubare w’abo bivugwa ko batorotse nturamenyekana, ariko hari amakuru avuga ari babiri andi akavuga umwe.

Si ubwa mbere abanyarwanda bajya hanze bahagarariye igihugu bagatoroka, kuko uretse abagenda bagiye gukina mu izina ry’u Rwanda, hari n’abahanzi bavuzweho gutoroka.

Si Abanyarwanda gusa batoroka bageze i mahanga, kuko muri iyi mikino ya Commonwealth ngo hanatorotse abanyaCameroun, Sierra Leone n’Abagande.

Ni ikibazo kiganje ku banyafurika, umugabane uvugwamo uruhuri rw’ibibazo nk’ubukene, ubwimukira, umutekano muke ahanini ushingiye ku bibazo bya politiki.

Ni mu gihe uyu mugabane ushyize imbere gahunda zo guteza imbere abawutuye hagamijwe guca imyumvire y’isha itamba ituma bashidukira amahanga kabone nubwo baba babibona ko hari n’ababiburiramo ubuzima.

Yisangize Inshuti.

Ibitekerezo

Tanga Igitekerezo