Uburasirazuba : Ntibavuga rumwe ku itegeko ryo gukuramo inda

Itegeko ryo gukuramo inda ryakunze kutavugwaho rumwe na benshi mu Rwanda, bamwe mu baturage bo mu Ntara y’Uburasirazuba ntibarivugaho rumwe.

Kuva Itegeko ryemerera abagore gukuramo inda mu Rwanda ryemejwe, rigasohoka mu Itegeko ngenga ryo kuwa 02/05/2012 mu igazeti ya Leta kuwa 14 Kamena 2012, ryakuruye impaka nyinshi mu baturage na n’ubu zigikomeza.

Kuri iyi nshuro abaganiriye na Radio 10 na Tv10 bo mu Karere ka Nyagatare harimo abemeza ko byaba ari byiza dore ko ngo no kuboneza urubyaro bisanzwe bikorwa na byo babigereranya no gukuramo inda.

Gukuramo inda

Ku rundi ruhande ariko iri tegeko hari abaryamaganira kure bakuvuga ko ari ugukora amakosa akomeye cyane yo kwica umuntu.

Ingingo yo mu gitabo cy’amategeko y’u Rwanda ya 165 rivuga ko uwemerewe gukuramo inda ari uwafashwe ku ngufu, uwashyingiwe ku gahato n’uwatewe inda n’uwo bafitanye isano ya hafi, ariko icyemezo kigatangwa n’urukiko nyuma y’iperereza n’urubanza.

Ubushakashatsi bwakozwe muri 2012 na Minisiteri y’Ubuzima n’Ikigo cy’Abanyamerika, Guttmacher Institute ku bufatanye n’iyahoze ari Kaminuza Nkuru y’u Rwanda, bwerekana ko mu Rwanda inda zikurwamo zisaga 6000 buri mwaka.

Ubu bushakashatsi kandi bugaragaza ko abagore 25 ku 1000 bafite hagati y’imyaka 15 na 44 bakuramo inda buri mwaka.

Muri 2016, MINISANTE ku bufatanye n’izindi nzego yemeje ko igihe ntarengwa cyo gukuramo inda ari ibyumweru 22, ni ukuvuga (amezi atanu) kuko nyuma y’aho umwana uri mu nda aba yatangiye kugira ubuzima.

Ubu bushakashatsi buvuga ko kuva muri 2012 kugeza 2014, inda zakuriwemo kwa muganga ari 2644. Muri zo 97% zikaba zarakuwemo kubera ko zabaga zibangamiye ubuzima bw’umubyeyi cyangwa ubw’umwana.

Yisangize Inshuti.

Ibitekerezo

Tanga Igitekerezo