ANOCA Zone V : U Rwanda rwabonye imidali itanu ku munsi wa kabiri, mu mikino y’amaboko rugera muri ½

Abakinnyi bahagariye u Rwanda mu mikino y’urubyiruko rwo mu karere ka Gatanu ‘ANOCA Zone V Youth Games 2019’ bakomeje kwitwara neza, aho ku munsi wa kabiri w’iyi mikino, habonetse imidali itanu mu mukino w’amagare na Taekwondo mu gihe muri Beach Volleyball na Basketball y’abakina ari batatu amakipe yose yageze muri ½.

Nyuma y’uko u Rwanda rubonye umudali umwe ku munsi wa mbere, watwawe na Niyonkuru Marthe mu gusiganwa ku maguru muri metero 400, kuri uyu wa Kane hakinwe umunsi wa kabiri w’iyi mikino ihuje ibihugu 12, haboneka indi midali itanu.

U Rwanda rwatangiye neza muri Taekwondo

Mu mukino wa Taekwondo, kuri uyu wa Kane nibwo batangiye gukina maze u Rwanda rutahana imidali itatu mu cyiciro cy’abakobwa n’icy’abahungu.

Umurerwa Nadège yegukanye umudali wa Zahabu mu bafite munsi y’ibiro 63, Iradukunda Mucyo Ivan, yegukana umudali wa Feza mu bari munsi y’ibiro 48 mu gihe Niyomukiza Edison yatwaye Umulinga (Bronze) mu barengeje ibiro 73.

Shahd Ahmed Mohamed Elsherbiny Gomaa w’umunya-Misiri ni we wegukanye umudali wa Zahabu mu bari munsi y’ibiro 49 mu bakobwa mu gihe Alaphilippe Souleyman wo mu Bufaransa, yegukanye Zahabu mu bari munsi y’ibiro 48 mu bagabo.

Amri Bassem wo mu Bufaransa, na we yatwaye umudali wa Zahabu mu bari munsi y’ibiro 63 mu bagabo mu gihe mu bari munsi y’ibiro 73, na ho watwawe na Panyasiri Phongsavanh wo mu Bufaransa.

Muri rusange, umunsi wa mbere muri Taekwondo, wasize u Bufaransa bwatumiwe muri iyi mikino, bufite imidali itanu bunganya na Misiri mu gihe u Rwanda rufite imidali itatu runganya na Kenya.

Kuri uyu wa Gatanu, harakinwa umunsi wa kabiri, aho Umuhoza Adinette ahatana na Mbabazi Lady wo mu ikipe Olempike y’Impunzi mu bari munsi y’ibiro 55 mu gihe Ntaganda Vincent ategereza utsinda hagati ya Boutouyah Athman w’Umufaransa na Yel Geng Mayuot wo muri Sudani y’Epfo mu batarengeje ibiro 73.

Ingabire Anitha arahangana na Rehani Dalya w’Umufaransakazi mu bari munsi y’ibiro 44 mu gihe Tumukunde Emmanuella we akina n’utsinda hagati ya Nada W. Gadallah wo mu Misiri na Yakoubova Karina w’Umufaransakazi mu bari hejuru y’ibiro 63.

U Rwanda rwabonye imidali ibiri mu Amagare

Kuri uyu wa Kane, nibwo hatangiye gukinwa umukino w’amagare muri iri rushanwa ryateguwe ku bufatanya bwa Minisiteri y’Umuco na Siporo, Komite Olempike y’u Rwanda n’Impuzamashyihamwe ya za komite Olempike zo mu karere ka Gatanu (ANOCA Zone V), rihuza ibihugu 12 birimo u Bufaransa bwaritumiwemo.

Abasiganwa bakoze intera ya kilometero 16,2 mu muhanda wa Sovu- Gashikiri mu gitondo, habarwa ibihe byakoreshejwe nk’ikipe (Team Time Trial).

Uhiriwe Byiza Rénus, Habimana Jean Eric, Muhoza Eric na Nsabimana Jean Baptiste bari bahagarariye u Rwanda mu bahungu batarengeje imyaka 18, begukanye umudali wa Zahabu, bakoresheje iminota 25 n’amasegonda 55.

Ikipe y’u Burundi yaje ku mwanya wa kabiri ikoresheje iminota 30 n’amasegonda 31 mu gihe ikipe ya gatatu yabaye Uganda yakoresheje iminota 33 n’amasegonda arindwi.

Mu bakobwa ; Ingabire Diane, Irakoze Neza Violette, Nzayisenga Valentine na Ishimwe Diane bahesheje u Rwanda umudali wa Feza nyuma yo kuza ku mwanya wa kabiri inyuma ya Érythrée.

Érythrée yakoresheje iminota 31 n’amasegonda 55 kuri iyi ntera ya kilometero 16,2 mu gihe ikipe y’u Rwanda yakoresheje yakoresheje iminota 32 n’amasegonda 39. U Burundi bwabaye ubwa gatatu mu gihe ikipe ya kane yabaye iya Uganda.

Abasiganwa ku magare barongera gusubira mu muhanda kuri uyu wa Gatanu, mu nzira banyuzemo kuri uyu wa Kane, ariko noneho buri wese asiganwa ku giti cye (Individual Time Trial) mu gihe ku wa Gatandatu hazaba isiganwa ryo mu muhanda (Road Race) mu byiciro byombi.

Muri Basketball 3x3, amakipe y’u Rwanda yageze muri ½

Mu mukino Basketball ikinwa n’abakinnyi batatu, ikipe y’u Rwanda n’iy’abakobwa, zombi zabonye itike yo gukomeza muri ½.

Ikipe y’abahungu igizwe na Irumva Landry, Umuhoza Jean de Dieu, Mudende Rutishisha Bruce na Nkundwa Thierry, yatsinze Sudani y’Epfo amanota 14-8, itsinda Somalia amanota 21-5 ndetse na Kenya ku manota 22-10.

Indi mikino yabaye, Misiri yatsinze Somalia ku manota 21-2 ndetse na Sudani y’Epfo kuri 21-6. Tanzania yatsinze Uganda ku manota 16-11, inatera mpaga u Burundi. Uganda yatsinze Sudani 19-13 mu gihe Kenya yatsinze Somalia 21-6.

Kuri uyu wa Gatanu, u Rwanda rurakina na Uganda mu gihe Tanzania yisobanura na Uganda muri ½.

Mu cyiciro cy’abakobwa, ikipe y’u Rwanda igizwe na Butera Hope, Ineza Sifa Joyeuse, Iryimanivuze Deborah na Mwizerwa Faustine, kuri uyu wa Kane, yatsinze Uganda 14-8, inatsinda ikipe ya Misiri ku manota 16-5.

Indi mikino yabaye ; Uganda yatsinze u Burundi 7-4, Sudani y’Epfo itsinda ikipe y’Impunzi za Nyabiheke amanota 8-3, Misiri itsinda u Burundi 15-7 na bwo bwaje kwihimura ku ikipe y’Impunzi buyitsinda amanota 13-3 mbere y’uko Uganda itsinda Sudani y’Epfo amanota 20-7.

Kuri uyu wa Gatanu, u Rwanda rurakina na Sudani y’Epfo mu gihe Misiri izahura na Uganda muri ½.

Muri Beach Volleyball na ho amakipe y’u Rwanda yitwaye neza agera muri ½

Mu mikino yabaye kuri uyu wa Kane, ikipe y’impunzi yatsinzwe na Misiri amaseti 2-0 (11-21, 12-21), Kenya yatsinze Sudani y’Epfo 2-0 (21-14, 21-19), inatsinda u Burundi 2-1 (21-13, 19-21, 15-9) mu gihe Misiri yongeye gutsinda Uganda 2-0 (21-17, 21-16).

Rwanda 2 yatsinze u Burundi amaseti 2-0 (25-23, 21-08) na Sudani 2-0 (21-0, 21-0) mu gihe Sudani y’Epfo na yo yatsinze Sudani 2-0 (21-0, 21-0), Rwanda 1 itsinda Uganda 2-0 (21-12, 21-9).

Mu itsinda rya mbere, Rwanda 1 yasoje iri ku mwanya wa kabiri n’amanota arindwi, inyuma ya Misiri ifite amanota umunani mu gihe Uganda ifite amanota abiri naho ikipe Olempike y’Impunzi ikagira ubusa.

Mu itsinda rya kabiri, Kenya yabaye iya mbere n’amanota umunani, Rwanda 2 iba iya kabiri n’amanota atanu, Sudani y’Epfo n’u Burundi banganya amanota atanu na bo ku mwanya wa gatatu n’uwa kane mu gihe Sudani yabaye iya nyuma nta nota ifite.

Mu mikino ya ½ iba kuri uyu wa Gatanu, Rwanda 2 irahura na Misiri naho Rwanda 1 ikine na Kenya mbere y’uko hamenyekana uwegukana igikombe.

Mu bakobwa, Rwanda 2 yatsinze Kenya amaseti 2-1 (16-21, 21-16, 15-12) mu gihe Uganda yatsinze u Burundi 2-0 (21-7, 21-12) naho Misiri itsinda Sudani y’Epfo 2-0 (21-13, 21-18).

Mu itsinda rya mbere, Rwanda 1 yabaye iya mbere n’amanota atandatu, Uganda iba iya kabiri n’amanota atatu mu gihe u Burundi nta nota bwabonye.

Mu itsinda rya kabiri, Misiri yabaye iya mbere n’amanota icyenda, Rwanda 2 iba iya kabiri n’amanota atanu, Kenya iba iya gatatu n’amanota atatu mu gihe Sudani y’Epfo yaherutse izindi mu itsinda n’inota rimwe.

Muri ½, Rwanda 1 irahura na Rwanda 2 mu gihe Misiri ihura na Uganda mbere y’uko hamenyekana uwegukana igikombe kuri uyu wa Gatanu.

Abanyarwanda ntabwo bongeye guhirwa mu gusiganwa ku maguru

Mu gihe kuwa Gatatu habonetse umudali umwe, kuri uyu wa Kane ho nta mudali wabonetse ku banyarwanda bakinnye.

Melkam Alemayhu Kassa wo muri Éthiopia yegukanye umudali wa Zahabu muri metero 1500 mu gihe umunyarwandakazi Uwitonze Claire yabaye uwa gatandatu.

Umunyakenyakazi Yeko Enit yatwaye umudali wa zahabu muri metero 3,000 naho umunyarwandakazi Niyonkuru Florence yabaye uwa gatanu muri iki cyiciro.

Umunya-Éthiopia Mengistu Bakele Tedecha yabaye uwa mbere mu bahungu mu gusiganwa muri metero 3,000, Bakunzi Aimé Epaphrodite aba uwa gatandatu mu gihe Kibet Samuel wo muri Uganda, yabaye uwa mbere mu gusiganwa muri metero 5,000, Uwimana Félix aba uwa kane.

Yisangize Inshuti.

Ibitekerezo

Tanga Igitekerezo