Ibuka yagaragaje kutanyurwa n’imbabazi Kiliziya Gatolika yasabye ku butumwa iherutse gutambutsa

Umuryango uharanira inyungu z’abacitse ku icumu (IBUKA), watangaje ko utanyuzwe n’imbabazi Kiliziya Gatolika yasabye ku butumwa iheruka gutanga isabira abahamijwe Jenoside yakorewe Abatutsi bageze mu zabukuru n’abarwaye koroherezwa ibihano.

Izi ni imbabazi zagarutsweho mu butumwa Abepisikopi Gatolika bo mu Rwanda bageneye abakirisitu mu Kwibuka ku nshuro ya 25 Jenoside yakorewe Abatutsi mu 1994, bwasomwe muri kiliziya zose zo mu gihugu ku wa 7 Mata 2019, umunsi Abanyarwanda n’inshuti zabo batangiriyeho icyumweru cy’icyunamo.

Ubu butumwa buvuga ko “Hariho kandi n’abari mu magereza kubera inkurikizi za Jenoside yakorewe Abatutsi, harimo abageze mu zabukuru n’abafite indwara zitandukanye. Aba bantu bagomba gufashwa, ‘hakanarebwa uburyo bakoroherezwa ibihano’ ; ariko kandi na bo bagakomeza kwinjira muri gahunda yo gusaba imbabazi no kwiyunga n’abo bahemukiye.”

Ubwo hasozwaga icyumweru cy’icyunamo ku wa 13 Mata 2019, Kiliziya Gatolika yasohoye itangazo rindi yisegura ku butumwa bushishikariza abakirisitu guharanira ubumwe n’ubwiyunge, gusaba imbabazi no kuzitanga mu rwego rwo kwiyubaka.

Itangazo ryashyizweho umukono na Perezida w’Inama y’Abepisikopi Gatolika mu Rwanda, Musenyeri Filipo Rukamba, rivuga ko “Muri iyo baruwa hari ibyakomerekeje abantu cyane cyane ibirebana n’ibyo twasabiye abashaje n’abarwaye cyane bari mu munyururu bafungiwe icyaha cya Jenoside.’’

Rikomeza rigira riti “Tubabajwe nuko byakomerekeje abantu cyane cyane bitewe n’igihe twabivugiye. Ibyo sibyo twari tugamije. Dusabye imbabazi kuko twabivuze muri iki gihe gikomeye cy’icyunamo.’’

Mu kiganiro na IGIHE, Perezida wa IBUKA, Prof. Dusingizemungu Jean Pierre, yavuze ko Kiliziya Gatolika idakwiye kuvuga ko yasabye imbabazi kubera ko yavuze aya magambo mu gihe cyo kwibuka gusa, ahubwo igomba kumenya ko bariya bantu barimo gusabira imbabazi ari abantu binangiye batigeze basaba imbabazi mu gihe igihugu cyatanze umwanya wo kuzisaba.

Yagize ati “Bariya ni abantu binangiye, kuki Kiliziya Gatolika ijya kubasabira imbabazi ubundi ubwabo batarasabye imbabazi ?. Twebwe icyo tuvuga kirenga n’ibyo Kiliziya ivuga byo kubasabira imbabazi muri ibi bihe byo kwibuka”.

“Kiliziya ishobora kuvuga ngo ibyo yicuza ni ugusaba imbabazi muri ibi bihe yo kwibuka ariko nibirangira usanga bongeye kuvuga nka byabindi, turanenga ibintu bibiri, igihe izo mbabazi zisabiwe no kuvuga ngo bariya bantu bavanwe muri gereza batarangije igihe.”

Yakomeje agira ati “Itangazo rya Kiliziya Gatolika ni igice, twibaza ko hari abatumva uburemere bw’icyaha cya Jenoside, bariya basaza nibo bubatse ingengabitekerezo ya Jenoside kuki banga ko bahanwa ? Niba bavuga ko barwaye niyo wabarekura bazakomeza barware kuko ni ugusaza, ubu se niba hari nk’umuntu wakatiwe gufungwa burundu bamurekure ? Ubwo ni ukuvuga ngo icyo gihano bakivaneho, kereka niba batumva uburemere bwa kiriya cyaha cya Jenoside.”

Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Bizimana Jean Damascène, ku wa 13 Mata 2019, ubwo yari ku Rwibutso rwa Rebero, mu muhango wo kwibuka abanyapolitiki bishwe muri jenoside yakorewe abatutsi, yanenze ibaruwa ya Kiliziya.

Yagize ati “Iyo hari abantu bamwe bavuga ngo aba basaza nimubarekure barakuze kandi ari bo baroze u Rwanda muri ubu buryo, nkeka ko ari ukwirengagiza ukuri.”

Yisangize Inshuti.

Ibitekerezo

Tanga Igitekerezo