Mali : Abantu bitwaje intwaro bitwikiriye ijoro bica abantu 95

Abantu bitwaje intwaro bitwikiriye ijoro bica abantu 95 babarashe abandi babatwikira mu mazu mu gitero bagabye mu gihugu cya Mali rwagati ejo kuwa mbere.

Umuvugizi wa Ministeri y’Umutekano muri Mali Amadou Sangho yavuze ko abandi 19 baburiwe irengero.

Umunyamakuru ukorera muri ako gace yabwiye Ijwi ry’Amerika, ishami ry’igifaransa ko abagabye igitero bari bagendereye koreka agasozi k’ahitwa Sobanetou, kari hafi y’umugi wa Mopti uri muri Mali rwagati.

Yavuze ko umubare w’abapfuye ushobora kugera ku 100. Amakuru y’ibanze avuga ko ako gasozi gatuwe n’abo mu bwoko bw’aba Dogon gashobora kuba katewe n’abarwanyi bo mu bwoko bw’aba Fulani.

Itangazo ryasohowe na Stephanie Dujarric umuvugizi w’Umunyamabanga Mukuru w’Umuryango W’abibumbye, riravuga ko Antonio Guterres yarakajwe cyane n’icyo gitero ahamagarira impande zombi muri Mali guhagarika ibikorwa byo kwihimura. Inama ishinzwe amahoro ku isi y’umuryango w’abibumbye iratenaganya guhura muri uku kwezi kuganira ku buryo bwo gushyira ingabo zishinzwe amahoro muri Mali.

Ubushamirane hagati y’aba Dogon n’aba Fulani bumaze imyaka. Kuri 23 z’ukwa gatatu aba Fulani 160 baguye mu gitero cyagabwe ahitwa Ogossagou. Abahigi b’aba Dogon nibo bashinjwe ubwo bwicanyi.

Yisangize Inshuti.

Ibitekerezo

Tanga Igitekerezo