TAEKWONDO: Haratangira imikino ya Korean Ambassador’s Cup Championships 2021

Facebook
Twitter
LinkedIn
WhatsApp

Ishyirahamwe ry’umukino njya rugamba wa Taekwindi mu Rwanda (Rwanda Taekwondo Federation/RTF) ku bufatanye na Ambasade ya Korea mu Rwanda bateguye irushanwa ngarukamwaka ‘The Korean Ambassador’s Cup Championships 2021’, rizaba rikinwa ku nshuro ya munani (8), kuko ryatangiye gukinwa bwa mbere mu 2013. Iry’uyu mwaka riratangira kuri uyu wa gatandatu rizasozwe kuri iki cyumweru tariki 24 Ukwakira 2021.

Umuhango wo gufungura irushanwa ry’uyu mwaka (Opening Ceremony) uteganyijwe kuri uyu wa gatandatu tariki 23 Ukwakira 2021 guhera saa tanu z’amanywa (11h00’).

Izindi Nkuru

Ni irushanwa rizakinwa mu buryo budasanzwe bitewe n’uko tukiri mu bihe bidasanzwe byo kwirinda ikwirakwira ry’icyorezo COVID-19, rikazaba ku itariki ya 23 – 24 Ukwakira 2021, rikabera muri Petit Stade Amahoro i Remera.

Ubusanzwe, The Korean Ambassador’s Cup ni irushanwa mpuzamahanga, ndetse buri kipe yajyaga yandikisha umubare w’abakinnyi bose ishaka.

Icyakora ubu si ko bimeze, kuko rizitabirwa n’abakinnyi bakina imbere mu gihugu gusa, kandi buri kipe ikazandikisha umukinnyi umwe muri buri cyiciro (Category), hagamijwe kwirinda ubucucike mu irushanwa.

Ni irushanwa rizakinwa muri Kyorugi ku ngimbi n’abangavu n’abakuze mu bagabo n’abari n’abategarugori, abazaba biyandikishije aha bakaba ari bo bazemererwa kurushanwa no mu myiyereko (Poomsae), mu gihe abana (Cadets) bo bazarushanwa muri Poomsae gusa.

Irushanwa rizakinwa mu buryo bukurikira:

Abagabo: Abatarengeje ibiro 58 (U-58Kg), Abatarengeje 68 (U-68Kg) n’Abari hejuru y’ibiro 68 (Above 68Kg)

Abari n’Abategarugori: Abatarengeje ibiro 49 (U-49Kg), Abatarengeje 57 (U-57Kg) n’Abari hejuru y’ibiro 57 (Above 57Kg)

Ingimbi: Abatarengeje ibiro 48 (U-48Kg), Abatarengeje 55 (U-55Kg) n’Abari hejuru y’ibiro 55 (Above 55Kg)

Abangavu: Abatarengeje ibiro 44 (U-44Kg), Abatarengeje 49 (U-49Kg) n’Abari hejuru y’ibiro 49 (Above 49Kg)

Abana (Cadets): Bazarushanwa mu myiyereko (Poomsae) gusa.

Abakinnyi n’amakipe bazaba bahize abandi mu irushanwa bazahabwa imidari n’ibikombe, ndetse banahabwe ibindi bihembo birimo Smartphones n’ibikoresho bya Taekwondo.

Irushanwa ‘Korean Ambassador’s Cup’ ryaherukaga gukinwa mu 2019, umwaka ushize rikaba ritarakinwe bitewe n’icyorezo COVID-19. Irushanwa riheruka ryari ryegukanywe n’Ikipe ya Paradisso Taekwondo Club yo muri Kenya, ikurikirwa na Dream Taekwondo Club ndetse na Police Taekwondo Club.

Ndacyayisenga Aline wa Police Taekwondo Club ni we wari wahize abandi mu cyiciro cy’abari n’abategarugori, mu gihe mu bagabo, Francis Ngugi Mulwa ari we wahize abandi.

 

 

Leave a Reply

Your email address will not be published. Required fields are marked *

IzindiNkuru