Perezida Donald Trump wa Leta Zunze Ubumwe za America, yatangaje ko ibiganiro biri kuba hagati y’iki Gihugu na Iran, ari amahirwe ya nyuma yahaye Tehran ngo yemere gusinya amasezerano yo guhagarika intambara, bitaba ibyo igahura n’akaga gakomeye, mu gihe iki Gihugu cyo kinabihakana kivuga ko nta biganiro bihari.
Perezida Donald Trump kuri uyu wa Mbere, yavuze ko ko ibiganiro na Iran bikomeje nubwo Tehran yabihakanye kandi ko Leta y’iki Gihugu, ubu gihangane “n’amahirwe ya nyuma mbere yo kubona akaga gakomeye.”
Trump, aganira n’abanyamakuru muri White House, yavuze ko yemeye gukomeza ibiganiro na Iran ku busabe bwa Saudi Arabia, Leta Zunze Ubumwe z’Abarabu, Qatar n’ibindi Bihugu byamugiriye inama.
Ni mu gihe Minisiteri y’Ububanyi n’Amahanga ya Iran yo kuri uyu wa Mbere yahakanye ibi biganiro na Washington, ivuga ko nta biri kuba, mu gihe Trump yemeje ko ibyo biganiro biri kuba, aho yagize “Turi kuganira ubu.”
Perezida wa America yongeyeho ati “Aya ni amahirwe ya nyuma kuri bo yo gusinya inyandiko nziza. Ndashaka kubaha amahirwe yose mbere yo gucibwa imitwe.”
Ibiganiro bigamije kongera gufungura Umuhora wa Hormuz, Trump yavuze ko bishobora kuzaba “ejo” [ubwo ni uyu munsi], no guhagarika ikoreshwa ry’intwaro za kirimbuzi muri Iran, yavuze ko bishobora “gufata igihe gito.”
RADIOTV10