Duane “Keffe D” Davis, wahoze ari umuyobozi w’agatsiko k’abagizi ba nabi, yakatiwe igifungo cy’imyaka 40 nyuma yo guhamwa n’uruhare mu mugambi wo kwica umuraperi w’icyamamare Tupac Shakur.
Ku wa Kabiri, urukiko rwakatiye Davis, ufite imyaka 63, nyuma y’uko inteko y’abacamanza imuhamije icyaha cy’ubwicanyi yakoreshejwe intwaro ishobora kwica umuntu, muri Nzeri 2026.
Tupac Shakur yarashwe agapfa ku wa 7 Nzeri 1996, mu gitero cyagabwe ku modoka yari arimo i Las Vegas muri Leta Zunze Ubumwe za Amerika.
Nubwo Davis atigeze arasa Tupac ubwe, abashinjacyaha bavuze ko ari we wari uyoboye itsinda ryakoze ubwo bwicanyi. Mu gitabo yanditse, Davis yemeye ko ari we watanze imbunda yakoreshejwe mu kwica uyu muraperi. Davis yatangaje ko azajuririra umwanzuro w’urukiko.
Urubanza rwe rwabaye urwa mbere rutanzweho umwanzuro w’icyaha muri dosiye y’ubwicanyi bwa Tupac yari imaze imyaka hafi 30 itarasobanuka neza, ikaba yarakomeje gushishikaza abakunzi b’umuziki wa hip-hop ku isi.
Mu iburanisha ryo kumenya igihano Davis agomba guhabwa, umushinjacyaha Marc DiGiacomo yavuze ko yamaze imyaka myinshi avuga ku ruhare rwe muri ubwo bwicanyi, ndetse akabwirata mu ruhame.
Yavuze ko urupfu rwa Tupac rwagize ingaruka zikomeye ku bantu benshi no ku isi muri rusange.
Umuryango wa Tupac wasabye igihano gikomeye
Sekyiwa Shakur, mushiki wa Tupac, yabwiye urukiko ko urupfu rw’umuvandimwe we rwagize ingaruka zikomeye ku muryango wabo.
Yagize ati “Kubura Tupac byagize ingaruka ku muryango wanjye mu gihe kirekire.”
Yakomeje avuga ko umuvandimwe we yari afite imigambi myiza n’icyizere cyo gufasha abantu, by’umwihariko abo mu gace yakuriyemo, agamije kugira uruhare mu kubaka isi irushijeho kuba nziza.
Sekyiwa yasabye umucamanza guha Davis igihano kiremereye gishoboka, amubwira ko azamara igihe muri gereza atekereza ku ngaruka z’ibyo yakoze ku isi, atari ku muryango we gusa.
RADIOTV10