Amakipe abiri ahagarariye u Rwanda mu marushanwa Nyafurika ya CAF arakina imikino yo kwishyura, aho APR FC izakira Zamalek yo mu Misiri, mu gihe Rayon Sports izakira Black Bulls yo muri Mozambique. Imikino yombi irabera kuri Stade Amahoro.
APR FC, ihagarariye u Rwanda muri CAF Champions League, irakina na Zamalek kuri uyu wa Gatanu, mu gihe Rayon Sports, ihagarariye igihugu muri CAF Confederation Cup, izakira Black Bulls ku wa Gatandatu.
Amateka agaragaza ko APR FC itaragera mu matsinda ya CAF Champions League kuva amarushanwa yahindurirwa imiterere. Mu myaka yashize, iyi kipe yigeze kugera muri ½ cy’Igikombe cyitwaga Cup Winners’ Cup.
Imwe mu ntsinzi itazibagirana mu mateka ya APR FC ni iyo yasezereragamo Zamalek, iyitsinda ibitego 4-1 kuri Stade Amahoro, nyuma yo gutsindwa ibitego 3-2 mu mukino ubanza wabereye mu Misiri.
Byari ibirori bikomeye ku mupira w’amaguru nyarwanda, kuko APR FC yabaye ikipe ya mbere yo mu Rwanda itsinze ikipe yo mu bihugu by’Abarabu muri ubwo buryo.
Abakinnyi barimo Gatete, Mulisa, Makombe na Silengo bagize uruhare rukomeye muri iyo ntsinzi, bakaba bagikomeje kwibukwa n’abakunzi ba APR FC.
Muri uyu mwaka, APR FC ifite intego yo kugera mu matsinda, ikaba yarahisemo gukoresha imvugo igira iti “Tubikore iwacu”. Icyakora, kugira ngo ibigereho, igomba kubanza gutsinda Zamalek, ikipe ikomeye yo mu Misiri.
Mu myaka itatu ishize, APR FC yasezerewe na Pyramids yo mu Misiri itaragera kure mu marushanwa. Kuri iyi nshuro, Zamalek ni yo ihagaze imbere yayo, kandi ni yo iherutse kwegukana igikombe cyo mu Misiri imbere ya Pyramids.
Abakinnyi ba APR FC barimo Ouattara na Dawuda Togui, hamwe na bagenzi babo, bahize kuzasezerera Zamalek no guhesha ibyishimo abakunzi b’iyi kipe.
Ku ruhande rwa Rayon Sports, yo yageze mu matsinda ya CAF Confederation Cup bwa mbere mu 2018, nyuma yo gusezerera Costa do Sol yo muri Mozambique.
Iyi kipe y’i Nyarugenge irifuza kongera kugera mu matsinda, ikaba igomba kubanza gusezerera Black Bulls, na yo yo muri Mozambique.
Rayon Sports na yo ifite intego yo kubanza kwitwara neza imbere y’abafana bayo kuri Stade Amahoro, mu mukino ubanza uzaba ku wa Gatandatu.
Abakinnyi barimo Eldinho, Mokono, Jigwiba na Kamini, hamwe na bagenzi babo, barifuza kongera gushimisha abakunzi ba Rayon Sports no guhesha u Rwanda ishema mu marushanwa Nyafurika.
Imikino ya APR FC na Rayon Sports iritezweho byinshi, kuko amakipe yombi aharanira kugera mu cyiciro gikurikiraho no gukomeza guhagararira u Rwanda neza ku rwego rw’umugabane wa Afurika.
Leonidas NDAYISABA
RADIOTV10