Urubanza ku kongera iminsi 30 y’ifungwa ry’agateganyo ruregwamo abantu barimo Ntihanabayo Samuel uzwi nka Kazungu, nyiri uruganda Ingufu Gin, na Prof. Emile Bienvenue wahoze ayobora Rwanda FDA, rwasubitswe nyuma y’uko abunganizi babo bagaragaje indi nzitizi ijyanye n’igihe ikirego cyashyiriwe muri sisitemu y’inkiko, bavuga ko bakurikije igihe cyagiriyemo, abakiliya babo bagakwiye kuba bararekuwe.
Ni urubanza ruburanishwa n’Urukiko rw’Ibanze rwa Kicukiro, aho rwasubitse iburanisha kuri uyu wa Kane tariki 15 Ukwakira 2026, iburanisha ryaje rikurikira umwanzuro w’urukiko wo ku wa 13 Ukwakira, wemeje ko rufite ububasha bwo kuburanisha iki kirego, nyuma y’uko ku wa 7 Ukwakira abunganizi b’abaregwa bari bavuze ko urukiko rukwiye kuba ari ururi hafi y’Igororero rya Mageragere bafungiyemo.
Mu iburanisha ryo kuri uyu wa Kane, Me Bizimana Emmanuel wunganira abarimo Kayihura Belinda, yavuze ko muri sisitemu y’ikoranabuhanga ikoreshwa n’inkiko ya EICMS bigaragara ko ikirego cyo kongera iminsi 30 y’ifungwa ry’agateganyo cyakiriwe ku wa 3 Ukwakira 2026 saa 7:32 za mu gitondo.
Yavuze ko iminsi 30 bari bafungiwe yarangiye ku wa 2 Ukwakira saa sita z’ijoro, bityo ko bagombaga kurekurwa mu gihe nta kindi cyemezo cyari cyafashwe mu gihe giteganywa n’amategeko. Yashingiye ku ngingo ya 79 y’itegeko rigenga imiburanishirize y’imanza nshinjabyaha, iteganya igihe ikirego cyo kongera iminsi y’ifungwa ry’agateganyo kigomba gutangirwa.
Abunganizi bavuze ko kuba ikirego cyaragaragaye muri sisitemu ku wa 3 Ukwakira, ari wo wa Gatandatu, kandi urukiko rukaba rwaracyakiriye ku wa 5 Ukwakira nyuma y’impera z’icyumweru, bituma bakeka ko cyatanzwe igihe cyarenze. Basabye urukiko kuzirikana n’urubanza rwabaye mu 2019, aho Urukiko Rukuru rw’Ubucuruzi rutakiriye ubujurire bw’Akarere ka Rusizi kubera ko bwari bwatanzwe butinze muri EICMS.
Ku ruhande rw’Ubushinjacyaha, bwavuze ko ikirego n’umwanzuro wacyo byashyizwe muri sisitemu ku wa 2 Ukwakira, nk’uko bigaragara kuri konti yabwo, kandi ko ibibazo byaba byaragaragaye mu buryo ikoranabuhanga ryerekana amakuru bitagakwiye kubiryozwa.
Abunganizi b’abaregwa ariko bavuze ko nta kibazo cya tekiniki cyari muri EICMS, kuko na bo bashoboraga kuyikoresha bareba niba hari ikirego cyatanzwe. Bongeyeho ko igihe sisitemu idakora neza, amategeko ateganya ko inyandiko zishobora koherezwa ku rubuga rwa imeyili rw’urukiko, ariko ko Ubushinjacyaha butagaragaje ko bwakoresheje ubwo buryo.
Nyuma yo kumva impande zombi, Urukiko rw’Ibanze rwa Kicukiro rwafashe icyemezo cyo gusoza iburanisha kuri iyo nzitizi, rukazatangaza umwanzuro warwo ku wa 20 Ukwakira 2026 saa munani z’amanywa.
Abaregwa 13 bakurikiranyweho ibyaha bifitanye isano no gutunganya ibinyobwa bitujuje ubuziranenge no gutanga ibyangombwa bijyanye na byo. Umwanzuro w’urukiko ku nzitizi yatanzwe ushobora kugira ingaruka ku cyemezo cyo kongera iminsi 30 y’ifungwa ry’agateganyo ryabo.
RADIOTV10