Umugaba Mukuru w’Ingabo z’u Rwanda, akaba n’Umuyobozi w’Icyubahiro Wungirije wa APR FC, Gen MK Mubarakh, ari kumwe n’Umugaba Mukuru w’Inkeragutabara, Maj Gen Alex Kagame, basuye abakinnyi n’abatoza ba APR FC, mu gihe iyi kipe iri mu myiteguro ya nyuma y’umukino izahuramo na Zamalek yo mu Misiri.
Aba bayobozi basuye iyi kipe ku mugoroba wo kuri uyu wa Kane, tariki ya 15 Ukwakira 2026, bayisaba kwitwara neza muri uyu mukino, nk’uko yabigenje mu mukino uheruka wa CAF Champions League, aho yasezereye Les Aigles du Congo.
Mu butumwa yahaye abakinnyi n’abatoza, Gen MK Mubarakh yababwiye ko ubuyobozi n’Abanyarwanda muri rusange babafitiye icyizere, bityo ko biteze ko bazongera kwitwara neza.
Yagize ati: “Twese tubafitiye ikizere nk’icyo twari tubafitiye mbere yo gusezerera ikipe mwahuye na yo, Les Aigles du Congo. No kuri uyu mukino twiteguye ko muzitwara neza. Hano hanze buri wese yiteguye kubashyigikira, namwe tubitezeho kubigenza nk’uko byagenze ubushize.”
Yongeyeho ko yifuza ko APR FC izashimisha Abanyarwanda, bashyigikiye iyi kipe kandi biteguye kuyitera ingabo mu bitugu muri uyu mukino.
Gen MK Mubarakh kandi yashimye intambwe iyi kipe imaze gutera mu gukosora amakosa yagaragaye mu mikino yabanje, avuga ko ibyo yakoze bigomba gukomeza kugaragarira mu kibuga.
Ati: “Mufite byinshi mwakosoye mu mikino yagiye itambuka kandi byatanze umusaruro. Ibyo tubitezeho ejo ni ugushimisha Abanyarwanda aho bari hose, kandi na bo biteguye kubatera ingabo mu bitugu. Ibindi byacu bitureba nk’ubuyobozi nyuma y’umukino, muzi aho duhigurira, no kuri iyi nshuro ni uko bizagenda.”
Nyuma y’ubu butumwa, Maj Gen Alex Kagame, wayoboye APR FC ubwo yasezereraga Zamalek mu 2004, na we yaganirije abakinnyi, abasangiza inama n’ibanga ryamufashije kugera ku ntsinzi muri icyo gihe.
Yabasabye gukorera hamwe, kumva amabwiriza y’umutoza no gufashanya mu kibuga, ashimangira ko intsinzi ishingira ku bumwe n’imikoranire myiza y’abakinnyi.
Yagize ati: “Ntimugire ngo hari ikindi gitanga intsinzi atari ugushyira hamwe nk’ikipe. Ugomba kumenya ko aho mugenzi wawe ananiwe umufasha, kandi ibyo bitanga umusaruro ugaragara. Hagati yanyu muganire, muhe ibitekerezo, ahasigaye musenyere umugozi umwe. Twese turi inyuma yanyu.”
APR FC irakira Zamalek kuri uyu wa Gatanu, tariki ya 16 Ukwakira 2026, saa kumi n’ebyiri z’umugoroba (18:00), kuri Stade Amahoro i Remera, mu mukino utegerejwe na benshi mu bakunzi b’umupira w’amaguru mu Rwanda.
Uyu mukino uraba umwanya ukomeye kuri APR FC wo kwerekana ko ishobora guhangana n’amakipe akomeye ku mugabane wa Afurika, mu gihe abakinnyi basabwa gukurikiza inama z’ubuyobozi n’iz’umutoza kugira ngo bazagere ku ntego biyemeje.
RADIOTV10