Ibihugu bitanu byo mu Karere k’Ibiyaga Bigari birimo u Rwanda, DRC n’u Burundi, byahuriye mu Nama yo ku rwego rw’Abaminisitiri, bisuzuma kandi byemeza umushinga w’amabwiriza agenga kwambura intwaro abarwanyi b’abanyamahanga, kubacyura no kubafasha gusubira mu buzima busanzwe.
Uyu mwanzuro wafatiwe mu nama yo ku rwego rwo hejuru y’Abaminisitiri yabereye i Lusaka muri Zambia ku wa 18 Ukwakira 2026, yitabiriwe n’intumwa z’u Rwanda ziyobowe na Minisitiri w’Ingabo, Juvenal Marizamunda.
Nk’uko Minisiteri y’Ingabo mu Rwanda yabitangaje, iyi nama yakurikiye iyahuje impuguke zitandukanye yabaye ku wa 17 Ukwakira 2026.
Yahuje ba Minisitiri b’Ingabo, ba Minisitiri b’Ububanyi n’Amahanga n’ababahagarariye baturutse mu bihugu bigize Itsinda rishinzwe Guhuza no Gukurikirana ibikorwa birebana n’umutekano (Contact and Coordination Group).
Iri tsinda rigizwe n’u Rwanda, Repubulika Iharanira Demokarasi ya Congo (RDC), u Burundi, Uganda na Tanzania.
Abitabiriye iyi nama basuzumye kandi bemeza umushinga w’amabwiriza ngenderwaho azagenga ibikorwa byo kwambura intwaro abarwanyi b’abanyamahanga bari mu mitwe yitwaje intwaro ikorera mu Karere k’Ibiyaga Bigari, kubacyura mu bihugu bakomokamo no kubafasha kongera kwinjira mu buzima busanzwe.
Uyu mushinga uzashyikirizwa abakuru b’ibihugu birebwa na wo kugira ngo bawusuzume kandi bawemeze burundu.
Kwambura intwaro abarwanyi no kubasubiza mu buzima busanzwe ni kimwe mu bikorwa bishobora gufasha mu kugabanya ibikorwa by’imitwe yitwaje intwaro no gushimangira amahoro n’umutekano mu Karere k’Ibiyaga Bigari.
RADIOTV10