Harimo Abanyafurika babiri: Hasohotse urutonde rw’abakinnyi 10 binjiza amafaranga menshi ku Isi

Ikinyamakuru Forbes Magazine cyashyize hanze urutonde rw’abakinnyi 10 b’umupira w’amaguru binjiza amafaranga menshi ku Isi, ruyobowe na Cristiano Ronaldo ukinira Al-Nassr yo muri Arabie Saoudite, ukurikirwa na Lionel Messi ukinira Inter Miami yo muri Leta Zunze Ubumwe za Amerika.

Kuri uru rutonde, Ronaldo aza ku mwanya wa mbere n’amafaranga abarirwa muri miliyoni 300 USD, mu gihe Messi aza ku mwanya wa kabiri n’amafaranga agera kuri miliyoni 145 USD

Abakinnyi babiri bakomoka muri Afurika na bo babashije kwinjira muri uru rutonde, barimo Sadio Mané ukomoka muri Sénégal na Mohamed Salah wo mu Misiri.

Ronaldo arusha abandi kure

Cristiano Ronaldo ni we uza ku mwanya wa mbere, aho amafaranga yinjiza abarirwa muri miliyoni 300 z’amadolari, akubye hafi kabiri ayo Lionel Messi aza ku mwanya wa kabiri yinjiza.

Kylian Mbappé ukinira Real Madrid aza ku mwanya wa gatatu n’amafaranga miliyoni 100 z’amadolari, agakurikirwa na Erling Haaland wa Manchester City ufite miliyoni 85 z’amadolari.

Vinícius Júnior na Lamine Yamal na bo bari muri batandatu ba mbere, binjiza miliyoni 76 na miliyoni 55 z’amadolari.

Sadio Mané na Mohamed Salah bahagarariye Afurika

Sadio Mané, ukomoka muri Sénégal, ari ku mwanya wa karindwi n’amafaranga miliyoni 54 z’amadolari, mu gihe Mohamed Salah wo mu Misiri ari ku mwanya wa 10 n’amafaranga miliyoni 40 z’amadolari.

Aba bakinnyi bombi ni bo Banyafurika bari kuri uru rutonde rw’abakinnyi 10 binjiza amafaranga menshi ku Isi.

Uru rutonde rugaragaza itandukaniro rikomeye mu mafaranga abakinnyi bakomeye binjiza, aho Ronaldo akomeje kuba ku isonga, mu gihe abandi bakinnyi bakiri bato nka Lamine Yamal na Jude Bellingham na bo bagaragaza ko bamaze kugera ku rwego rwo kwinjiza agatubutse.

Urutonde rw’abakinnyi 10 bahembwa agatubutse ku Isi

1. Cristiano Ronaldo: Miliyoni 300 USD
2. Lionel Messi: Miliyoni 145 USD
3. Kylian Mbappé: Miliyoni 100 USD
4. Erling Haaland: Miliyoni 85 USD
5. Vinícius Júnior: Miliyoni 76 USD
6. Lamine Yamal: Miliyoni 55 zUSD
7. Sadio Mané: Miliyoni 54 USD
8. Jude Bellingham: Miliyoni 45 USD
9. Harry Kane: Miliyoni 42 USD
10. Mohamed Salah: Miliyoni 40 USD

RADIOTV10