Ubuyobozi bukuru bw’Umutwe wa FRN, washinzwe ugasimbura Ihuriro AFC/M23, bwagiranye ibiganiro n’abayobozi bakuru bawo hagamijwe kubumvikanisha icyerekezo cya politiki, ingamba z’ishyirwa mu bikorwa ry’imigambi yawo n’ibikorwa byihutirwa ugomba gushyira imbere.
Ibi byagarutsweho mu nama yabereye i Goma kuri uyu wa Kabiri, tariki 20 Ukwakira 2026, yahuje ba Visi Perezida babiri ba FRN, Corneille Nangaa Yobeluo na Bertrand Bisimwa, hamwe n’abandi bayobozi bakuru b’uyu mutwe.
Iyi nama yari igamije kungurana ibitekerezo ku mushinga wa FRN wo kuvugurura Igihugu, gukomeza ubumwe mu bayobozi bawo no guhuza imyumvire ku byerekezo bya politiki by’uyu mutwe.
Mu itangazo ryashyizwe ahagaragara na FRN, uyu mutwe wavuze ko ibiganiro byibanze ku mahame shingiro y’icyerekezo cyawo cya politiki, guhuza ibikorwa by’inzego zawo zitandukanye ndetse n’uruhare rw’abayobozi bakuru mu gushyira mu bikorwa ibyemezo n’ingamba byawo.
Ibiganiro kandi byagarutse ku kamaro ko gukomeza ubumwe, kubahiriza umurongo n’amabwiriza agenga imikorere y’umutwe, ndetse no gushishikariza abayobozi kuwufasha gukomeza no gushyira mu bikorwa umushinga wo kuvugurura igihugu.
FRN yashimangiye ko intego zayo ari ukuvugurura DRC
FRN yatangaje ko ishaka gushyira umushinga wayo mu murongo wo kuvugurura Repubulika Iharanira Demokarasi ya Congo, ishingiye ku kongera kubaka inzego za Leta, gusubiza ubutabera agaciro, gukomeza umutekano no guteza imbere ubwiyunge bw’Abanyekongo.
Uyu mutwe kandi uvuga ko ushaka gushyiraho inzego z’ubuyobozi zishobora gusubiza ibyifuzo n’inyungu by’abaturage ba Congo.
Ibiganiro byahuje ba Visi Perezida b’uyu mutwe n’abayobozi bakuru byari bigamije kandi gushimangira imikoranire hagati y’inzego z’ubuyobozi no gutegura uburyo ibyemezo bya politiki byahindurwamo ibikorwa bifatika.
FRN yashimangiye ko ibiganiro hagati y’abayobozi bayo ari ingenzi mu kubaka icyerekezo bahuriyeho no gukomeza guhuza ibikorwa by’inzego zayo.
Uyu mutwe mushya washinzwe usimbura Ihuriro AFC/M23, ukaba uyobowe na Joseph Kabila wahoze ari Perezida wa Repubulika Iharanira Demokarasi ya Congo, mu gihe Corneille Nangaa na Bertrand Bisimwa ari ba Visi Perezida bawo kimwe na Maj Gen Sultani Makenga, we akaba anabifatanya no kuba Umugaba Mukuru w’Igisirikare cya ARC cy’uyu mutwe.
RADIOTV10