Ubuyobozi bw’Ikipe ya Rutsiro FC bwatangaje ko bwahagaritse by’agateganyo umutoza wayo, Gatera Musa ndetse n’umunyezamu Mutemere Monzobo, nyuma yuko iyi kipe inyagiwe na APR FC ibitego 5-0.
Ibi bikubiye mu itangazo ryashyizwe hanze n’Ubuyobozi bwa Rutsiro FC kuri uyu wa Mbere tariki 28 Mata 2025, bumenyesha abakunzi b’iyi kipe n’ab’umupira w’amaguru muri rusange.
Rutsiro FC ivuga ko “Yahagaritse by’agateganyo umutoza wayo Mutemele Monzobo Arnold mu gihe gisigaye cya shampiyona 2024-2025.”
Ubuyobozi bwa Rutsiro FC bukomeza bugira buti “Iki cyemezo gifashwe nyuma y’umusaruro nkene aba bombi bagaragaje ku mukino wa Shampiyona w’umunsi wa 25 wahuje Rutsiro na APR FC tariki ya 26/04/2025 kuri Stade Umuganda.”
Nyuma y’ihagarikwa ry’umutoza Gatera Musa, iyi kipe ya Rutsiro FC iraba itozwa n’Umutoza Wungirije Rubangura Omar, uzayitoza mu mikino isigaye ya Shampiyona.
Ikipe ya Rutsiro FC yanyagiwe na APR FC ibitego 5-0 mu mukino w’umunsi wa 25 wa Shampiyona, aho iyi kipe y’Ingabo z’u Rwanda yari iriho ihatanira kwisubiza umwanya wa mbere w’agateganyo, ndetse birayihira kuko uwo munsi wakiniweho ku wa Gatandatu tariki 26 Mata yawurayeho ariko nyuma y’amasaha macye iwuhagurutswaho na mucyeba wayo Rayon Sports nyuma yo gutsinda Etincelles ibitego 2-1.
RADIOTV10
