Ibihugu birimo Korea y’Epfo n’u Buyapani, biratangaza ko Korea ya Ruguru yarashe ibisasu bya ballistic missile biraswa kure, bikemeza ko Ingabo z’ibi Bihugu zirwanira mu mazi, ziryamiye amajanja.
Ibi bisasu byarashwe mu byiciro bibiri kuri uyu wa Gatatu, birashwe nyuma y’umunsi umwe havuzwe ko hari isasu ritazwi ubwoko ryarashwe riturutse mu bice byo muri Pyongyang.
Igisirikare cya Korea y’Epfo, mu gitondo cyo kuri uyu wa Gatatu cyatangaje ko cyabashije gutahura ko “hari isasu ritazwi ubwoko” ryarashwe riturutse mu murwa mukuru wa Korea ya Ruguru, mbere y’umunsi umwe.
Nyuma y’isaha imwe iki gisirikare cya Korea y’Epfo, cyatangaje ko “hari ibisasu bitamenyekanye bya ballistic missiles” byarashwe mu gitondo cyo kuri uyu wa Gatatu biturutse mu gace ka Wonsan muri Korea ya Ruguru byerekeje mu Nyanja y’Iburasirazuba, mu gice cy’amazi cy’ahazwi nk’Inyanja y’u Buyapani.
Mu rindi tangazo ryashyizwe hanze n’iki gisirikare, cyatangaje ko izo misile zarashwe ahagana saa mbiri na mirongo itanu (08:50) zigakora ibilometero bigera muri 240. Ni mu gihe indi misire imwe yarashwe ahagana saa 02: 20 z’umugoroba.
Muri iri tangazo, Igisirikare cya Korea y’Epfo cyagize kiti “Igisirikare cyacu cyakajije ubugenzuzi no kuryamira amajanja mu kwitegura iraswa ry’ibindi bisasu, mu gukomeza guharanira ko Igihuru gihora cyiteguye mu buryo bwuzuye.”
Ibiro bya Minisitiri w’Intebe w’u Buyapani, na byo mu itangazo byashyize hanze mu gitondo cyo kuri uyu wa Gatatu, byatangaje ko “Koreya ya Ruguru yarashe misile ikekwaho kuba igisasu cya ballistic.” Byizeza ko biza gutanga amakuru arambuye nyuma.
Igisirikare cy’u Buyapani kirwanira mu mazi, na cyo cyagize icyo kivuga kuri ibi bisasu byarashwe na Korea ya Ruguru, kivuga kandi ko amato ya gisirikare yacyo yiteguye.
RADIOTV10
