Ikipe y’Igihugu y’u Rwanda y’Abagore ya Volleyball yageze muri 1/4 cya Shampiyona Nyafurika iri kubera muri Kenya, nyuma yo gutsinda Burkina Faso amaseti 3-0.
Uyu mukino wa 1/8 wabaye ku manywa yo kuri iki Cyumweru, tariki ya 30 Kanama 2026, aho u Rwanda rwigaragaje neza kuva umukino utangiye kugeza urangiye.
Abakobwa b’u Rwanda batangiye umukino bigaragaza ko bafite intego yo gukomeza mu cyiciro gikurikiyeho, batsinda iseti ya mbere ku manota 25-19. Iya kabiri na yo bayiharaniye kugeza bayitsinze ku manota 25-16.
Mu iseti ya gatatu, u Rwanda rwakomeje kuganza Burkina Faso, ruyitsinda ku manota 25-8, ruhita rutwara umukino ku ntsinzi y’amaseti 3-0.
Muri 1/4, u Rwanda ruzahura n’ikipe izatsinda umukino uzahuza Zambia na Ghana.
Mu irushanwa riheruka gukinwa mu 2023, Ikipe y’Igihugu y’u Rwanda y’Abagore yasoje ku mwanya wa kane.
RADIOTV10