Abanyarwanda bane barangije amasomo mu Ishuri Rikuru ry’Igisirikare kirwanira mu Kirere mu Gihugu cya Turkiye (Air Force Academies of the National Defense University of Turkiye), bahawe ipeti rya Sous Lieutenant na Perezida w’iki Gihugu, Recep Tayyip Erdoğan.
Aba Banyarwanda barangije muri Air Force Academies of the National Defense University of Turkiye, ni Byiringiro Arnauld, Cyizere Prince, Mbanzabugabo Daniel, na Mugabe Robert.
Ambasade y’u Rwanda muri Turkiye, yatangaje ko “Ejo hashize tariki 30 Kanama 2026 muri Ankara, Abanyarwanda bane barangije muri Military and Air Force Academies of the National Defense University of Turkiye.”
Umuhango wo gusoza amasomo kw’aba Banyarwanda wanitabiriwe na Ambasaderi w’u Rwanda muri Turkiye, Lt Gen (Rtd) Kayonga Charles ndetse n’uhagarariye inyungu z’Igisirikare cy’u Rwanda muri ambasade yarwo muri Turkiye,
Ambasade y’u Rwanda muri Turkiye yakomeje ivuga ko aba basirikare “bahawe ipeti rya Sous Lieutenant na Perezida wa Repubulika ya Turkiye, nyakubahwa Recep Tayyip Erdoğan.”
Igihugu cy’u Rwanda n’icya Turkiye bisanganywe imikoranire mu nzego zinyuranye zirimo n’ibya gisirikare, mu ngeri zirimo n’ibijyanye no guhanahana ubumenyi.
Mu kiganiro Perezida wa Turkiye, Recep Tayyip Erdoğan aherutse kugirana kuri Telefone na mugenzi we Perezida Paul Kagame, bemeranyijwe ko Ibihugu byombi birushaho kwagura no gukomeza guteza imbere ibijyanye n’inganda z’ingabo.
RADIOTV10