Leta Zunze Ubumwe za Amerika zatangaje ko zafatiye ibihano byo kudaha guha Visa abantu barenga 15 bashinjwa kugira uruhare mu gutegura, gufasha no gushishikariza amatsinda y’abimukira kwinjira muri iki Gihugu mu buryo bunyuranyije n’amategeko.
Ibi byatangajwe na Minisiteri y’Ububanyi n’Amahanga ya Leta Zunze Ubumwe za Amerika, mu itangazo rigaragaza ko ubutegetsi bwa Perezida Donald Trump bwiyemeje gukumira ibikorwa byose bishobora guhungabanya umutekano w’Igihugu n’amategeko agenga abinjira n’abasohoka.
Iyi Minisiteri yavuze ko yafashe ingamba zo gufatira ibihano abantu barenga 15 bagize uruhare mu gutegura, korohereza cyangwa kwamamaza ingendo z’amatsinda y’abimukira aherutse kugerageza kugera muri Amerika.
Yagize iti “Ubutegetsi bwa Trump ntibuzihanganira ibikorwa bihungabanya umutekano w’Igihugu cyangwa amategeko agenga abinjira n’abasohoka muri Leta Zunze Ubumwe za Amerika.”
Yakomeje ivuga ko bwiyemeje kurinda umutekano w’imipaka, gusenya inzira zose zifashishwa mu icuruza ry’abantu no guhana abantu bagira inyungu bakura mu bikorwa byo kwinjiza abimukira mu Gihugu mu buryo butemewe.
Minisiteri y’Ububanyi n’Amahanga yavuze ko iperereza ryagaragaje abantu bashaka abimukira, bagahuza amatsinda manini y’abashaka kujya muri Amerika, bakanayobora ingendo zabo banyuze muri Amerika yo Hagati na Mexique berekeza ku mupaka wo mu majyepfo wa Amerika.
Yasobanuye ko politiki yo gufatira ibihano bya Visa abayobozi b’Ibihugu by’amahanga n’abandi bantu bagira uruhare mu korohereza abimukira kwinjira muri Amerika mu buryo bunyuranyije n’amategeko yari yaratangajwe mbere, ariko ubu izakoreshwa no ku bantu bategura, bashishikariza, bashyigikira cyangwa batanga amafaranga akoreshwa mu gutegura izo ngendo.
Iyi Minisiteri yihanangirije ko abantu bagira uruhare muri ibyo bikorwa, ndetse n’abimukira bari muri ayo matsinda, nibasaba Visa ya Amerika cyangwa bakagerageza kujya muri icyo Gihugu, bazakorerwa igenzura ryimbitse. Bashobora kwangirwa Visa cyangwa izo bari bafite zigakurwaho.
Amerika yihanangirije abinjira mu Gihugu mu buryo butemewe
Minisiteri y’Ububanyi n’Amahanga ya Amerika yongeye kwibutsa ko kwambuka umupaka wo mu majyepfo w’iki Gihugu nta burenganzira bibujijwe n’amategeko.
Yavuze ko umuntu ufashwe yinjira muri Amerika mu buryo bunyuranyije n’amategeko ashobora gufungwa, agafungirwa mu kigo cy’abimukira, agasubizwa mu Gihugu cye kandi agafatirwa icyemezo cyo kutazongera kwinjira muri Amerika mu gihe kizaza.
Yashimangiye ko n’abantu bafasha abandi kwinjira muri Amerika mu buryo bunyuranyije n’amategeko, kimwe n’ababigiramo uruhare, bashobora gufatirwa ibihano birimo kutemererwa kubona Visa.
Izi ngamba ziri mu murongo w’ubukangurambaga bw’ubutegetsi bwa Donald Trump bugamije gukaza umutekano ku mipaka ya Amerika no kugabanya umubare w’abantu binjira muri iki gihugu batabifitiye uburenganzira.
RADIOTV10