Ubuyobozi bw’umutwe wa Front pour la Refondation de la Nation (FRN) bwagiranye ibiganiro n’abahagarariye imiryango mpuzamahanga itanga ubutabazi, bubasaba kwita ku kibazo cy’ubuzima n’imibereho y’abaturage bo mu misozi miremire ya Minembwe, aho buvuga ko inzara n’ibura ry’ubuvuzi bikomeje guteza impfu.
Ibi byagarutsweho mu nama yabereye i Goma kuri uyu wa Gatanu, tariki ya 6 Ugushyingo 2026, yahuje abayobozi ba FRN n’abahagarariye imiryango mpuzamahanga ishinzwe ibikorwa by’ubutabazi.
FRN yari ihagarariwe na ba Visi Perezida bayo babiri, Corneille Nangaa na Bertrand Bisimwa, baganiriye n’abo bahagarariye imiryango itandukanye ku miterere y’ikibazo cy’ubutabazi kiri mu gace ka Hauts-Plateaux, by’umwihariko muri Minembwe.
Mu itangazo ryashyizwe hanze n’Umuvugizi wa FRN, Lawrence Kanyuka, ryagaragaje ko imibereho y’abaturage bo muri ako gace ikomeje kuzamba, bitewe n’ibibazo birimo inzara, kubura serivisi z’ibanze z’ubuvuzi ndetse n’ibura ry’ibicuruzwa bikenerwa mu buzima bwa buri munsi.
FRN ivuga ko muri Minembwe hamaze kwiyongera impfu z’abaturage zituruka ku mirire mibi n’inzara, hamwe no kutabona ubuvuzi bw’ibanze. Ibi bibazo ngo byiyongeraho ibura rikomeje ry’ibikoresho n’ibindi bicuruzwa by’ingenzi.
Muri iri tangazo, uyu mutwe ushinja ubutegetsi bwa Kinshasa gushyiraho ibihano byabaye intandaro y’ibibazo by’ibura ry’ibikenerwa muri Minembwe, uvuga ko byagize ingaruka zikomeye ku buzima bw’abaturage.
Mu rwego rwo gushaka igisubizo kuri iki kibazo, ubuyobozi bwa FRN bwasabye imiryango mpuzamahanga y’ubutabazi gushyira mu bikorwa inshingano zayo zo gufasha abaturage bari mu kaga.
Bwagaragaje ko hakenewe igikorwa cy’ubutabazi cyihutirwa, kidafite aho kibogamiye kandi gishingiye ku by’ibanze abaturage bakeneye, hibandwa cyane ku bafite intege nke kurusha abandi.
FRN yasabye ko ubufasha butangwa bwakwibanda ku kurokora ubuzima bw’abaturage no gukumira ko ikibazo cy’ubutabazi muri ako karere kirushaho gukomera.
RADIOTV10