Ikipe ya Rayon Sports yatsinze Jamus FC ihita yerekeza ku mukino wa nyuma wa CECAFA Kagame Cup yaherukagaho mu 1998, ibintu byahaye ibyishimo abakunzi ba Murera aho bari hose mu Gihugu, bakanabigaragaza.
Ni umukino wabereye kuri Kigali Pelé Stadium kuri uyu wa Kabiri tariki 04 Kanama 2026, urangira ikipe ya Rayon Sports itsinze Jamus ibitego 3-1. Rayon yatsindiwe na Muderi Akbar, Ibrahim Djingarey na Tambwe Ngongo Gloire, mu gihe igitego cya Jamus FC cyatsinzwe na Bandiougou Diallo.
Rayon Sports yaherukaga ku mukino wa nyuma w’iri rushanwa mu mwaka w’1998, icyo gihe yari yabereye muri Zanzibar Rayon itwara igikombe itsinze Mlandege ibitego 2-1, iki kikaba ari na cyo gikombe rukumbi igira.
Kugera ku mukino wa nyuma wa CECAFA Kagame Cup, byari ibyishimo ku bakunzi ba Rayon Sports, yaba abari kuri Sitade ndetse n’abari mu bindi bice by’Igihugu.
Bamwe bahise bakoranira ahantu hamwe bitewe n’aho bari bari, batangira kuririmba Murera, banishimira intsinzi y’ikipe yabo, kuba igeze ku mukino wa nyuma w’iri rushanwa riterwa inkunga n’Umukuru w’Igihugu cy’u Rwanda, Paul Kagame.
Mbere y’uko Rayon Sports ikina na Jamus FC mu mukino wa 1/2, Gor Mahia yabanje gukina na Al-Hilal banganya igitego 1-1 mu minota 120, birangira Gor Mahia isezereye Al-Hilal kuri penaliti 8-7.
Biteganyijwe ko Umukino wa nyuma uzaba ku wa 5 tariki 7 z’ukwa 8 2026, Saa Moya z’umugoro muri Stade Amahoro, uwo mukino ukazabanzirizwa n’uwo guhatanira umwanya wa 3 uzahuza Al-Hilal na Jamus i Saa Cyenda.
Jean Claude HITIMANA
RADIOT10