Umunyezamu w’ikipe ya Chelsea, umunya-Argentine Emiliano Martinez, yamaze impungenge abari bahangayikishijwe n’imvune ikomeye yagize nyuma yo kugongana na myugariro wa Everton, Jarrad Branthwaite, mu mukino wa shampiyona y’’u Bwongereza “Premier League”, hagati ya Everton na Chelsea.
Uyu munyezamu w’imyaka 34 yatangaje ko igikorwa cyo kumubaga cyagenze neza kandi azagaruka mu kibuga vuba.
Emiliano yavuye mu kibuga ahetswe mu ngobyi, yambitswe n’akuma gafasha ijosi kuguma hamwe, ibintu byateye impungenge abakunzi b’umupira w’amaguru by’umwihariko aba Chelsea, basigaye bamufata nk’uwaje kubacungura ku kibazo cy’abanyezamu iyi kipe imaranye imyaka itari mike.
Martinez yasimbuwe n’umwana muto Mike Penders ku munota wa 75 nyuma y’iminota isaga 8 ari kuvurwa aryamye mu kibuga .
Nyuma y’umukino, Chelsea yatsinzemo ibitego bibiri ku busa , umutoza wayo Xabi Alonso, yatangaje ko uyu munyezamu yari agihumeka neza kandi azi ibiri kumubaho ubwo yavaga kuri sitade ajyanywe kwa muganga.
Nyuma yaho, Martinez ubwe yatanze ubutumwa ku rubuga rwa Instagram, ashimira abamwoherereje ubutumwa bumwifuriza gukira vuba, anemeza ko yabazwe neza.
Yagize ati: “Ndashimira abantu bose banyandikiye, kubagwa byagenze neza. Icy’ingenzi kurushaho ni uko twatsinze umukino kandi tukawusoza tudatsinzwe igitego (clean sheet), ku ntsinzi ya 2-0. Nzagaruka mu kibuga mu byumweru bike.”
Chelsea yari imaze imikino 22 itabona clean sheet.
Nk’uko ikinyamakuru TyC Sports cyo muri Argentine cyabitangaje, Emiliano Martinez yabazwe nyuma yo kuvunika igufa ry’urwasaya.
Biteganyijwe ko ashobora kumara hafi ukwezi n’igice adakina, mu gihe akomeje kwitabwaho n’abaganga kugira ngo agaruke mu kibuga amaze gukira neza.
RADIOTV10