Nishimwe Naomie wabaye Nyampinga w’u Rwanda mu 2020, yakorewe ibirori bya ‘Baby Shower’ yari kumwe n’umugabo we, Michael Tesfay, abo mu miryango yabo n’inshuti, mu rwego rwo kwishimira imfura bitegura kwakira no kumwifuriza kuzabyara neza.
Ku Cyumweru, tariki 25 Ukwakira 2026, Miss Naomie yasangije abamukurikira kuri Instagram amashusho agaragaza ibyishimo byaranze ibi birori byateguwe mu rwego rwo kumushyigikira muri uru rugendo rwo kwitegura kuba umubyeyi.
Mu bitabiriye ibi birori, harimo ababyeyi be, abavandimwe n’inshuti ze, barimo Miss Nshuti Muheto Divine na Miss Mutesi Jolly. Abari bahari basangiye ibyishimo, baganira ndetse bamuha impano.
Mu mashusho yashyizwe hanze, Michael yagaragaye asoma umugore we ndetse anamukora ku nda, mu bimenyetso by’urukundo n’ibyishimo byo kwitegura kwakira umwana wabo. Aba bombi baherutse gutangaza ko bitegura kwibaruka umwana w’umuhungu.
Miss Naomie na Michael Tesfay basezeranye imbere y’amategeko ku wa 27 Ukuboza 2024, nyuma y’iminsi ibiri bakora indi mihango y’ubukwe bwabo.
Mu mpera za 2025, Miss Naomie yashyize hanze igitabo yise More Than a Crown, kivuga ku buzima bwe, urugendo rwamugejeje ku ikamba rya Miss Rwanda n’ibindi byaranze ubuzima bwe, birimo no gushyingirwa.
RADIOTV10