Ubuyobozi bwa Pariki y’Igihugu y’Akagera bwatangaje ko mu gihembwe cya Nyakanga kugeza muri Nzeri 2026, yakiriye ba mukerarugendo 15,790 ininjiza asaga miliyoni 1.5 USD (agera muri miliyari 2,2 Frw) avuye mu bikorwa by’ubucuruzi biyikorerwamo.
Raporo y’ibikorwa by’iyi pariki igaragaza ko muri abo bashyitsi, 13,911 ari bo bishyuye kugira ngo bayisure, mu gihe amafaranga yinjijwe mu bikorwa by’ubucuruzi muri icyo gihe yageze kuri 1,529,432$.
Muri Nzeri 2026, amafaranga impuzandengo umushyitsi yakoresheje yazamutse agera ku madolari 162, yiyongeraho 22% ugereranyije na Nzeri 2025. Ubuyobozi bw’iyi pariki buvuga ko ari yo mpuzandengo yo hejuru yari imaze kugerwaho kuva mu 2010.
Muri icyo gihembwe, Pariki y’Akagera yanakiriye inama ngarukamwaka y’ubuyobozi bwa African Parks, yakira abafatanyabikorwa n’abaterankunga, initabira ibikorwa bitandukanye birimo Wildlife Ranger Challenge, Akagera Trail Marathon na Kwita Izina.
Mu rwego rwo kurinda inyamaswa n’ibidukikije, abarinzi ba pariki bakoze amarondo 1,608, bakora urugendo rw’ibilometero 37,694. Abakurikirana inyamaswa na bo banditse inshuro 2,517 babonye inkura z’umweru n’inshuro 413 babonye inkura z’umukara.
Ubuyobozi bwanakomeje gukurikirana inzovu, aho abakoze ubushakashatsi mu murima babashije kumenya inzovu 55 zo mu matsinda abiri afitanye isano. Inzovu eshatu nshya zongerewe mu bubiko bw’amakuru y’inzovu zimaze kumenyekana, bituma umubare wazo ugera kuri 121, bingana na 85.2% by’inzovu zizwi muri pariki. Aya makuru afasha gukurikirana buri nzovu n’imiterere y’itsinda ryazo mu gihe kirekire.
Mu gihe cy’impeshyi, abakozi ba pariki banashyize imbaraga mu gukumira inkongi z’umuriro, bakoresheje gutwika ibyatsi mu buryo bugenzurwa, gukurikirana ahashobora kwibasirwa n’umuriro no gutabara byihuse aho wabaga utangiye. Imvura yatangiye kugwa hagati muri Nzeri.
Imishinga y’abaturage yatanze inyungu zisaga ibihumbi 416 USD
Ubuyobozi bwa Pariki y’Akagera yatangaje ko ibikorwa byayo bigamije guteza imbere abaturage byageze ku bantu 52,958, bitanga inyungu mu bukungu bw’abaturage zirenga 416,000$.
Mu rwego rwo gukurikirana imishinga iterwa inkunga binyuze muri gahunda yo gusaranganya amafaranga ava mu bukerarugendo, Pariki y’Akagera, Urwego rw’Igihugu rushinzwe Iterambere (RDB) n’abahagarariye uturere bakomeje gusura no gusuzuma imishinga yo mu turere twa Kayonza, Gatsibo na Nyagatare.
Muri Nyakanga, hasuwe imishinga 49 yo mu myaka y’ingengo y’imari ya 2024-2025 na 2025-2026. Muri yo, 19 yari yararangiye, 11 yari igeze ku kigero kirenga 95%, irindwi yari igeze kuri 70%, mu gihe 12 yari itaratangira.
Muri Nzeri, hongeye gukorwa isuzuma ry’indi mishinga 15. Icyenda muri yo yari yararangiye cyangwa iri hafi kurangira, mu gihe itandatu yari ikiri mu ntangiriro cyangwa itaratangira.
Gahunda yo gusaranganya amafaranga ava mu bukerarugendo igamije gufasha abaturage baturiye pariki kungukira mu bikorwa byayo, binyuze mu mishinga ibateza imbere ndetse no kubaka umubano mwiza hagati yabo n’inyamaswa zo muri pariki.
RADIOTV10