Barack Obama wabaye Perezida wa Leta Zunze Ubumwe za Amerika yanenze mu buryo bw’urwenya ibikorwa byo kuvugurura inyubako ya White House biri gukorwa na Donald Trump wamusimbuye, agaragaza ko uyu muyobozi asa n’uwibanda cyane ku mitako n’imihindurire y’inyubako kurusha ibindi.
Obama yabigarutseho ubwo yavugaga ku mpinduka Trump ari gukora muri White House, zirimo umushinga wo kubaka inzu nini yakirirwamo ibirori, guhindura ubusitani buzwi nka Rose Garden no kongera imitako y’amabara ya zahabu.
Mu magambo ye, Obama yavuze ko Trump yibanda cyane ku kuvugurura inzu, asetsa avuga ko akwiriye kugira ikiganiro cye kuri televiziyo cyibanda ku gutunganya no kuvugurura amazu.
Yagize ati: “Yibanda cyane ku kuvugurura amazu. Akwiye kugira ikiganiro kuri HGTV.”
HGTV ni televiziyo izwiho kwerekana ibiganiro bijyanye no kuvugurura amazu, kuyatunganya no guhindura uko agaragara.
Obama yakomeje kunenga mu buryo bw’urwenya imiterere y’izo mpinduka, by’umwihariko umushinga wa Trump wo kubaka inzu nini yakirirwamo ibirori muri White House, impinduka zakozwe muri Rose Garden ndetse n’imitako myinshi ya zahabu.
Mu gukomeza kugaragaza uko abona iyo mitako, Obama yagereranyije iyo sura n’aho uwahoze ari Perezida wa Iraq, Saddam Hussein, yaba afunguye ishami rya Cheesecake Factory, urunigi rw’amarestora ruzwi muri Amerika.
Yabajije mu buryo bwo gutebya ati: “Ese iyi zahabu yose ivuze iki?”
Aya magambo ya Obama agaragaza kutemeranya n’imiterere y’impinduka Trump ari gukora ku nyubako ya White House, aho yibanze cyane ku mitako n’imishinga yo guhindura uko iyo nyubako igaragara.
White House ni icyicaro cy’ubuyobozi bwa Perezida wa Leta Zunze Ubumwe za Amerika, kikaba n’ahantu akorera ibikorwa bye bya buri munsi ndetse hakakirwa abayobozi n’abandi bashyitsi baturutse mu bihugu bitandukanye.
RADIOTV10