Mu Rwanda haratangira imikino ya Super Cup, irushanwa ritangiza umwaka w’imikino wa 2026-2027, rigiye guhuza amakipe ane ari yo Kiyovu Sports, Mukura VS, Police FC na Rayon Sports ihabwa amahirwe yo kwegukana iki gikombe, cyahita kiba icya kabiri itwaye mu kwezi kumwe.
Mu myaka yashize, Super Cup yahuzaga ikipe yatwaye igikombe cya shampiyona n’iyabaga yatwaye Igikombe cy’Igihugu. Iyo ikipe yabaga yarabitwaye byombi, yakinaga n’iyabaye iya kabiri muri shampiyona.
Uyu mwaka, FERWAFA yabonye umufatanyabikorwa ushyiramo miliyoni 100 Frw, ihitamo gukoresha amakipe ane.
Kubera ko APR FC yari yatwaye ibikombe byose, hemejwe ko APR FC ihura na Kiyovu yabaye iya gatatu, mu gihe Rayon Sports yabaye iya kabiri ihura na Police FC yabaye iya kane.
FERWAFA yaguye mu kantu ibonye ibaruwa ya APR FC iyimenyesha ko itazitabira, nyamara ari yo yari yatwaye ibikombe.
APR FC yavugaga ko yamenyeshejwe bitinze, ikifuza ko hakinwa umukino umwe nk’uko byahoze.
Habaye inama nyinshi zo gusaba APR FC ko yagaruka mu irushanwa, ariko iratsimbarara.
FERWAFA yafashe icyemezo cyo kuyisimbuza Mukura VS, yabaye iya gatanu muri Rwanda Premier League.
Iri rushanwa ry’igikombe kiruta ibindi rigiye gukinwa nta kipe yatwaye igikombe irimo.
Rayon Sports ihabwa amahirwe yo kugitwara, nyuma yo gutsinda imikino yose imaze gukina, harimo no gutwara igikombe cya CECAFA.
Saa 15:00, Kiyovu irakina na Mukura, mu gihe saa 18:30 Rayon Sports ikina na Police FC.
Amakipe azatsinda azahura ku Cyumweru, aho izegukana igikombe izahabwa akayabo ka miliyoni 40 Frw.
Leonidas NDAYISABA
RADIOTV10