Perezida wa Leta Zunze Ubumwe za Amerika, Donald Trump, yahagaritse gahunda yo kwerekana imbonankubone kuri internet iyicwa rya Nidal Malik Hasan wahoze ari ofisiye mu gisirikare cya America, wakatiwe igihano cy’urupfu.
Gusa Trump yashimangiye ko uyu wahoze ari umusirikare, azicwa arashwe n’itsinda ry’abasirikare nk’uko byari biteganyijwe.
Mu butumwa yashyize ku rubuga rwe rwa Truth, Trump yavuze ko Hasan azahanishwa igihano cy’urupfu, ariko ko itangazamakuru n’abandi bantu batazabasha gukurikira iryo yicwa imbonankubone kuri internet.
Yagize ati “Azicwa arashwe n’itsinda ry’abasirikare, nk’uko byari biteganyijwe, ariko iki gikorwa ntikizerekanwa imbonankubone.”
Hasan, wahoze ari umuganga mu gisirikare cya Amerika, yahamijwe ibyaha bijyanye n’igitero yagabye mu 2009 ku kigo cya gisirikare cya Fort Hood muri Texas, kigahitana abasirikare 13 batari bitwaje intwaro, abandi 32 bagakomereka.
Gusa Trump yavuze ko imiryango ya hafi y’abishwe muri iki gitero izemererwa kwitabira iryo yicwa imbonankubone, niba ibishaka.
Ati “Icyakora, imiryango ya hafi y’abahitanywe n’icyo gitero ishobora kwirebera iyicwa imbonankubone, niba ibishaka.”
Mu ntangiriro z’uku kwezi, Minisitiri w’Ingabo za Amerika, Pete Hegseth, yari yatangaje ko iyicwa rya Hasan rizerekanwa imbonankubone kuri internet.
Icyo cyemezo cyateje impaka zikomeye, aho abanyapolitiki bo mu Ishyaka ry’Aba-Republicains n’iry’Aba-Démocrates bagaragaje impungenge z’uko amashusho y’iryo yicwa ashobora gukoreshwa mu kwamamaza iterabwoba cyangwa gushishikariza abandi gukora ibikorwa by’urugomo.
Mbere yo guhindura icyemezo cye, Trump yari yashyigikiye gahunda yo kwerekana iryo yicwa, avuga ko bishobora kubera isomo abandi bakarushaho kwirinda gukora ibyaha nk’ibyo.
Nidal Hasan ni muntu ki?
Nidal Malik Hasan ni uwahoze afite ipeti rya Major mu gisirikare cya Amerika, akaba yari n’umuganga w’indwara zo mu mutwe.
Ku wa 05 Ugushyingo 2009, yarashe abasirikare bari ku kigo cya gisirikare cya Fort Hood, muri Leta ya Texas. Abo basirikare bari bategereje gukorerwa ibizamini by’ubuvuzi mbere yo koherezwa mu butumwa bwa gisirikare. Icyo gitero cyahitanye abantu 13, abandi barenga 30 barakomereka.
Mu mwaka wa 2013, Urukiko rwa Gisirikare rwakatiye Hasan igihano cy’urupfu kubera uruhare yagize muri icyo gitero.
Kuva icyo gihe, yakomeje gufungirwa muri gereza ya gisirikare mu gihe igihano cye cy’urupfu cyari kigitegereje gushyirwa mu bikorwa.
RADIOTV10