Abatavuga rumwe n’ubutegetsi muri Repubulika Iharanira Demokarasi ya Congo bakajije umurego mu bikorwa byo kwamagana umugambi wo guhindura Itegeko Nshinga, basaba Perezida Félix Tshisekedi kwegura kubera uyu mugambi, banahamagarira Abanyekongo bose kuzitabira imyigaragambyo izanagera ku Ngoro ya Perezida.
Uku gusaba ko Perezida Tshisekedi yegura, byatangajwe kuri uyu wa Kabiri tariki 16 Kamena 2026, i Kinshasa n’Ihuriro ryiswe Article 64, ryanatangaje riri gutegura imyigaragambyo yo ku rwego rw’Igihugu izaba tariki 08 Nyakanga 2026.
Iri Huriro rivuga ko iyi myigaragambyo izakorwamo urugendo rw’amahoro ruzerecyeza ku Ngoro y’Umukuru w’Igihugu, ari na ho ruzasorezwa kuri iriya tariki.
Abagize iri Huriro batangaje ibi kuri uyu wa Kabiri nyuma yo gusuzuma indi myigaragambyo yabaye ku wa Gatanu w’icyumweru gishize tariki 12 Kamena 2026.
Prince Epenge, Umuvugizi w’Urugaga Lamuka rw’Imitwe ya Politiki itavuga rumwe n’ubutegetsi muri Congo, akaba n’umwe mu bagize ririya Huriro, yahamagariye abanyekongo bose kuzitabira iriya myigaragambyo.
Yagize ati “Abanyamuryango b’Ihuriro Article 64 bahisemo guhamagarira Abanyekongo bose mu ntara zose, muri Teritwari zose, muri Sheferi zose na Lokarite ndetse n’ahansi hose kuzitabira uru rugendo runini rw’amahoro ruzaba tariki 08 Nyakanga.”
Nk’uko Prince Epenge yabitangaje, i Kinshasa iyi myigaragambyo y’urugendo rudasanzwe ruzarangira kuri Mont-Ngaliema “rugamije gusaba ko Bwana Tshisekedi, wagambaniye Igihugu, akavuga ko agiye guhindura Itegeko Nshinga, kandi agiye gukora kamarampaka agamije kubangamira Igihugu.”
Ibi byatangajwe na ririya huriro, nyuma y’amasaha make Inteko Ishinga Amategeko yemeje itegeko riteganya kamarampaka yo guhindura Itegeko Nshinga rya Repubulika Iharanira Demokarasi ya Congo.
Abatavuga rumwe n’ubutegetsi bw’iki Gihugu ntibakozwa ibyo kuvugurura Itegeko Nshinga bigamije gucira inzira Perezida Félix Tshisekedi kuzitoza muri manda ya gatatu, mu gihe basanzwe banamunenga koreka iki Gihugu akakigusha mu bibazo uruhuri.
RADIOTV10
