Ubushinjacyaha Bukuru bw’u Bubiligi bwatangaje ko bwakoze umukwabu wo gusaka ingo z’abantu bo mu muryango wa Perezida wa Repubulika Iharanira Demokarasi ya Congo Félix Tshisekedi, bakurikiranyweho ibyaha bifitanye isano no kunyereza umutungo no kuwiba mu bikorwa by’ubucukuzi bw’amabuye y’agaciro mu Ntara ya Katanga.
Uyu mukwabu wakozwe kuri uyu wa Gatatu, tariki 14 Ukwakira 2026, mu bice bitandukanye by’u Bubiligi, birimo umurwa mukuru i Bruxelles n’uturere two mu ntara za Flandre na Wallonie.
Nk’uko ikinyamakuru La Libre Belgique kibitangaza, abapolisi benshi bo ku rwego rw’Igihugu bitabiriye iki gikorwa, bagiye gusaka ahantu hatandukanye, harimo n’aho bamwe mu bo mu muryango wa Tshisekedi batuye muri aka karere.
Iyi ni inyubako iherereye Muri Uccle mu Bubiligi, ikoreshwa nk’icumbi ry’abo mu muryango wa Tshisekedi. Muri 2023 hasohotse amakuru yavugaga ko hari hashize imyaka ibiri Perezida wa Repubulika Iharanira Demokarasi ya Congo, Félix Tshisekedi, n’umugore we bakodesha iyi nzu y’akataraboneka bishyuraga amayero 20 000 buri kwezi.
Nyiriyo nzu ni Robert Levy, washinze kandi uyobora imwe muri banki zikomeye cyane muri Repubulika Iharanira Demokarasi ya Congo.
Iperereza ryaturutse ku kirego cyatanzwe muri 2025
Ubushinjacyaha Bukuru bw’u Bubiligi bwatangaje ko iyi operasyon iri mu rwego rw’iperereza ry’ubutabera ryatangiye nyuma y’ibirego byatanzwe n’imiryango itegamiye kuri Leta muri Nyakanga 2025.
Ibi birego byagaragaje gukekwa ko hari abantu bo mu muryango wa Perezida Tshisekedi bagize uruhare mu kunyereza umutungo n’uburiganya bwo kuwugaragaza nk’utaribwe ibizwi nk’iyezandonke, bikekwa ko bifitanye isano n’ibikorwa by’ubucukuzi bw’amabuye y’agaciro muri Katanga, mu majyepfo ya DRC.
Ibi birego byatanzwe mu Bubiligi kubera ko bamwe mu barebwa na byo bafite ubwenegihugu bw’iki Gihugu. Amategeko y’u Bubiligi yemera ko abaturage bacyo bashobora gukurikiranwaho ibyaha bya ruswa no kunyereza amafaranga, n’iyo bivugwa ko byakorewe mu kindi Gihugu.
Iperereza ryari rimaze igihe kirenga umwaka rikorwa mu ibanga, ariko ibikorwa byo gusaka byakozwe kuri uyu wa Gatatu ni byo bya mbere bigaragara byakozwe n’ubutabera bw’u Bubiligi muri iki kirego.
Ubushinjacyaha bwirinze gutangaza amazina y’abakekwaho ibyaha
Mu itangazo ryabwo, Ubushinjacyaha Bukuru bw’u Bubiligi bwemeje ko ibikorwa byo gusaka byabereye icyarimwe i Bruxelles no mu bice bitandukanye byo mu ntara za Brabant Flamand na Brabant Wallon.
Bwavuze ko ntayandi makuru buratangaza, bugamije kubungabunga ibanga ry’iperereza no kubahiriza ihame ry’uko umuntu afatwa nk’umwere kugeza igihe Urukiko rumuhamije icyaha.
Ikinyamakuru La Libre Belgique cyatangaje ko kugeza ubu bitaramenyekana neza abantu bose bakozweho uyu mukwabu wo gusakwa, niba hari abatawe muri yombi cyangwa hari imitungo yafashwe, ndetse n’amafaranga akekwa kuba yaranyerejwe.
Kugeza ubu, Ibiro bya Perezida wa DRC na Guverinoma y’iki Gihugu ntibyari byagira icyo bivuga kuri iyi operasiyo yakozwe n’ubutabera bw’u Bubiligi.
Iperereza rikomeje mu gihe hataramenyekana neza uko ibirego byatanzwe bizakurikiranwa, ndetse n’icyo ubutabera buzanzura ku bantu barebwa na byo.
RADIOTV10