U Bwongereza burashinjwa intege nke mu guhangana n’ikibazo cy’abimukira bwiyambajeho u Rwanda

Raporo y’Urukiko rwo mu Bufaransa irashinja u Bwongereza kugenda biguru ntege mu ngamba zigamije kugabanya umubare w’abimukira bajya muri iki Gihugu.

Iyi raporo y’u Bufaransa yashyizwe hanze kuri uyu wa Kane tariki 04 Mutarama 2024, ishinja u Bwongereza kudashyira imbaraga zihagije mu kugabanya umubare w’abimukira bajya muri iki Gihugu bakoresheje ubwato buto.

Izindi Nkuru

Mauritania: Hatangajwe imbogamizi zitavugwaho rumwe zakomye mu nkokora uwifuza kongera guhatanira kuba Perezida

18/05/2024

Hatangajwe ibiri gukorerwa abimukira u Bwongereza buzohereza mu Rwanda n’ikizakorerwa abazabyanga

17/05/2024

Ni raporo yakozwe igamije gushyira hanze isuzuma ryakozwe ku mbaraga nke za Guverinoma y’u Bwongereza mu gushyiraho politiki zigamije gukumira abimukira.

Muri iyi raporo y’Urukiko rwo mu Bufaransa, ivuga ko iki Gihugu “gikomeje kunanizwa mu mikoranire n’u Bwongereza” igamije kugabanya imibare y’abimukira.

Iyi raporo yagendeye ku makuru yatanzwe n’itsinda rihuriweho ry’ubutasi bw’Ibihugu byombi ryashinzwe muri 2020, rigamije kurwanya icuruzwa ry’abantu ndetse n’umubare w’abantu bashyira ubuzima bwabo mu kaga banyura mu nzira zitemewe. Muri 2022, iri tsinda ryafashije mu gutahura inzira zirindwi zikoreshwa n’abimukira.

Iyi raporo ivuga ko urwo rukiko “rwatahuye ko u Bwongereza budatanga amakuru yafasha mu kumenya aho ubwato buto buzana abimukira buhagurukira ndetse n’amakuru y’ibanze yatuma ingendo z’abimukira ziburizwamo.”

Ikomeza igira iti “Imikoranire hagati y’u Bufaransa n’u Bwongereza irimo kudahuza umurongo mu bijyanye n’amakuru ndetse no gusangizanya iby’iperereza.”

Minisiteri y’Ingabo mu Bwongereza igereranya ko hagati ya 2021 na 2022 habayeho izamuka rya 58% ry’ubwato butwara abimukira bijira muri iki Gihugu mu buryo bunyuranyije n’amategeko, ndetse ngo mu gihe cy’umwaka hagaragaye abimukira ibihumbi 45 bageze mu Bwongereza.

Iyi raporo yatangajwe mu gihe u Bwongereza bukomeje gushyira imbaraga mu mikoranire yashyizweho umukono na Guverinoma y’iki Gihugu n’iy’u Rwanda igamije kugabanya umubare w’abimukira muri kiriya Gihugu, aho bamwe bazajya boherezwa mu Rwanda.

Guverinoma y’u Bwongereza, muri iki cyumweru yatangaje ko abimukira 33 085 bamaze kwemezwa ko bazoherezwa mu Rwanda, mu gihe Inteko Ishinga Amategeko y’iki Gihugu yaba imaze kwemeza aya masezerano ari hagati y’Ibihugu byombi.

RADIOTV10