Sengabo Jean Bosco uzwi nka Fatakumavuta, ukurikiranyweho ibirimo gukoresha imvugo ziremereye zikurura amacakubiri mu bantu, yafatiwe icyemezo cyo gufungwa by’agateganyo iminsi 30.
Ni icyemezo cyasomwe kuri uyu wa Gatatu tariki 06 Ugushyingo 2024 n’Urukiko rw’Ibanze rwa Kicukiro, nyuma yuko kuri uyu wa Kabiri yari yaburanishijwe ku ifungwa ry’agateganyo.
Urukiko rw’Ibanze rwa Kicukiro rwemeje ko hari impamvu zikomeye zituma uregwa akekwaho ibyaha aregwa, rutegeka ko afungwa by’agateganyo iminsi 30.
Mu iburanisha ryabaye kuri uyu wa 05 Ugushyingo 2024, Ubushinjacyaha bwasabaga Urukiko gufata icyemezo cyo gufunga by’agateganyo uregwa, bugaragaza ibimenyetso by’ibyaha biregwa uyu mugabo.
Ubushinjacyaha bwavuze ko mu bihe bitandukanye uregwa yagiye akoresha imvugo zirimo izisebanya mu biganiro yatangiraga ku mbuga nkoranyambaga, zirimo imiyoboro ya YouTube ndetse ku rubuga nkoranyambaga rwa X.
Bwagaragaje ko uregwa yavuze amagambo asebanya arimo ayo yavuze ku basanzwe bazwi mu myidagaduro mu Rwanda, barimo The Ben, Meddy, Muyoboke na Bahati.
Uregwa kandi na we yagiye yemera zimwe mu mvugo zahereweho aregwa, gusa akavuga ko hari n’abandi bavuze iziremereye kuzirusha kandi bakidembya hanze.
RADIOTV10
