Irushanwa rya GMT (Genocide Memorial Tournament) mu rwego rwo kwibuka ku nshuro ya 32 Jenoside yakorewe Abatutsi ryasojwe amakipe ya Kepler VC mu bagabo na Kenya Pipeline Women Volleyball Club mu bagore yegukanye ibikombe, nyuma yo gutsinda amakipe ya APR ku mikino ya nyuma.
Mu cyiciro cy’abagabo, Kepler VC yegukanye igikombe itsinze APR VC amaseti atatu ku busa. Uyu mukino warangiye Kepler yitwaye neza mu maseti yose, itsinda ku manota 25-22, 28-26 na 25-21.
Kepler VC yegukanye iki gikombe cyari cyatwawe na REG VC mu mwaka ushize.
Kuri iki cyumweru, REG VC yasoreje ku mwanya wa kane nyuma yo gutsindwa na Police VC mu mukino wo guhatanira umwanya wa gatatu.
Mu bagore, Kenya Pipeline Women Volleyball Club yo muri Kenya yegukanye igikombe nyuma yo gutsinda APR WVC amaseti 3-0. Ikipe ya Kenya Pipeline yagaragaje urwego rwo hejuru, itsinda amaseti ku manota 25-17, 25-20 na 25-15.
Umwanya wa gatatu mu bagore wegukanywe na Police WVC, yatsinze Kepler WVC amaseti 3-2.
Mu bihembo by’abakinnyi ku giti cyabo, Dusenge Wycliff wa Kepler VC niwe wabaye umukinnyi mwiza w’irushanwa (MVP) mu bagabo, mu bagore umunyakenyakazi Marian Sokoio niwe wabaye MVP.
Iri rushanwa rya GMT ryatangiye ku wa Gatanu, ryitabirwa n’amakipe 6 mu cyiciro cy’abagore harimo amakipe abiri yo mu mahanga, naho mu bagabo ryitabirwa n’amakipe 8 arimo na yo abiri yo mu mahanga. Ni irushanwa ngarukamwaka rigamije kwibuka Jenoside yakorewe Abatutsi mu 1994.
Ephrem KAYIRANGA
RADIOTV10
