Ingamba nshya zo kwirinda icyorezo cya COVID-19 zafatiwe mu Nama y’Abaminisitiri yateranye kuri uyu wa Gatanu, zivuga ko kwambara agapfukamunwa bitakiri itegeko.
Abaturarwanda bari bujuje imyaka ibiri basabwa kwambara agapfukamunwa kuko ingamba zibishyiraho zafashwe muri Mata 2020 ubwo iki cyorezo cya COVID-19 cyari gikajije umurego.
Ibyemezo by’Inama y’Abaminisitiri yateranye kuri uyu wa Gatanu tariki 13 Gicurasi 2022, birimo ingamba nshya zo kwirinda iki cyorezo.
Ingingo C y’igice cya mbere cy’ibi byemezo kigaruka ku ngamba zo gukumira ikwirakwirarya COVID-19, igira iti “Ntibikiri itegeko kwambara agapfukamunwa. Icyakora, abantu barashishikarizwa kwambara agapfukamunwa igihe bari ahantu hafunganye kandi hahuriye abantu benshi. Abaturage barakangurirwa kandi gukomeza kwipimisha kenshi no kubagiriza ingamba zo kwirinda COVID-19.”
Izi ngamba zo kwirinda COVID-19 zafatiwe mu Nama y’Abaminisitiri kandi, zisaba abaturarwanda kwikingiza byuzuye kugira ngo bemerewe kujya ahantu hahurira abantu benshi nko kugenda mu modoka zitwara abagenzi mu buryo bwa rusange.
RADIOTV10
