Ikipe ya Rayon Sports FC yasinyishije rutahizamu w’Umunyekongo, Chadrack Bingi Belo, aba umukinnyi mushya wa 6 uyisinyiye iyi kipe avuye mu y’iwabo muri Repubulika Iharanira Demokarasi ya Congo. Umwaka w’imikino ushize yabaye umukinnyi mwiza ukiri muto mu Gihugu cy’iwabo.
Bingi Belo bakunze kwita Tout Puissant attaquant ‘Djogo’ yasinye amasezerano y’imyaka ibiri, akurikiye abandi barimo Umunyezamu w’umunya-Mali Drissa Kouyaté, Abarundi Musore Prince na Tambwe Gloire Ngongo, Umunya-Tunisia Chelly Mohammed n’Umunya-Rwanda Rushema Chris.
Aba bakinnyi bashya bariyongera kuri Serumogo Ally na Biramahire Abedy bongereye amasezerano muri iyi kipe ya Rayon Sports yasoje umwaka w’imikino wa 2024-2025 iri ku mwanya wa kabiri muri shampiyona.
Chadrack Bingi Belo yageze mu Rwanda mu gicuku cyo kuri uyu wa Kabiri tariki 08 Nyakanga 2025, akaba yatangajwe n’ubuyobozi bw’ikipe ya Rayon Sports kuri uyu wa Gatatu tariki 09 Nyakanga 2025.
Mu butumwa buha ikaze uyu mukinnyi, ubuyobozi bwa Rayon bwagize buti “Rayon Sports yabonye rutahizamu w’Umunyekongo w’imyaka 20 Chadrack Bingi Belo wasinye amasezerano y’imyaka ibiri. Yatsindiye DC Motema Pembe ibitego 23 mu myaka ibiri y’imikino ishize.”
Uyu rutahizamu yakiniraga ikipe ya Darling Club Motema Pembe DCMP y’i Kinshasa, yasoje ku mwanya wa kane muri shampiyona ya Repubulika Iharanira Demokarasi ya Congo, byayiviriyemo kubura itike yo kuzitabira amarushanwa Nyafurika.
Bingi Belo w’imyaka 20 y’amavuko, yabaye umukinnyi muto mwiza muri Shampiyona y’umwaka ushize, aho yatsinze ibitego 13, mu gihe muri shampiyona y’uyu mwaka ya 2025-2025 yatsinze ibitego 10.
Mu kwa munani umwaka ushize 2024, uyu mukinnyi yagiye gukora igeragezwa muri Ghana mu ikipe ya Hearts of Oak, ariko kubera ibihano iyi kipe yari yarafatiwe ntiyashobora kumusinyisha.
Ephrem KAYIRANGA
RADIOTV10
