Rutahizamu w’Ikipe y’Igihugu Mavubi, Nshuti Innocent, yerekanywe nk’umukinnyi mushya wa ES Zarzis yo mu Cyiciro cya Mbere muri Tunisia.
Nshuti Innocent yerekanywe kuri uyu wa Gatanu tariki 25 Nyakanga 2025 nk’umukinnyi mushya wa ES Zarzis yasinye amasezerano y’imyaka ibiri.
Uyu rutahizamu w’Ikipe y’Igihugu y’u Rwanda, Nshuti Innocent, asinye muri iyi kipe yo muri Tunisia nyuma yo gutandukana na Sabail FK yo muri Azerbaijan.
Ni ubwa Kabiri Nshuti Innocent agiye gukina muri Tunisia, kuko no muri 2018 na bwo yanyuze muri Stade Tunisien yo mu Cyiciro cya Mbere muri iki Gihugu asubiyemo.
Iyi kipe ya ES Zarzis, mu mwaka ushize w’imikino yasoje shampiyona iri ku mwanya wa gatanu nyuma ya Esperance, Monastir, Etoile du Sahel na Club Africain zisanzwe zikomeye muri iki Gihugu.
Biteganyijwe ko uyu rutahizamu unabanza mu Ikipe y’Igihugu y’u Rwanda, Nshuti Innocent azakina umukino we wa mbere ku itariki 09 Kanama bakina na CS Sfaxien.
Aime Augustin
RADIOTV10
