Impinduka mu buyobozi bw’umujyi wa Kigali hari abo zahiriye abandi ntizabahira , Hashize imyaka itanu manda ya mbere irangiye kuva izi mpinduka zibaye aho uturere tw’uyu mujyi twahise twamburwa ubuzima gatozi n’imiterere y’ubuyobozi irahinduka byemejwe n’Itegeko N° 22/2019 ryo ku wa 29/07/2019 rigenga Umujyi wa Kigali.
Umujyi wa Kigali ni wo ufite ubuzima gatozi (legal personality) n’ubwigenge mu by’imicungire n’imari, kimwe n’Uturere tw’icyaro.
Uturere dutatu tuwugize (Gasabo, Nyarugenge, na Kicukiro) ntitwigenga mu buryo bwuzuye nk’uko byari bimeze mbere, ahubwo byahindutse inzego z’ubuyobozi z’Umujyi wa Kigali.
Iri vugurura ryari rigamije kunonosora imicungire no kwihutisha iterambere ry’Umujyi wa Kigali, binyuze mu gutuma igenamigambi n’ishyirwa mu bikorwa by’ibikorwa remezo bikorwa neza nta nzitizi z’ubuyobozi butandukanye.
Muri make, iri tegeko ryashyizeho uburyo bushya bwo kuyobora butuma Umujyi wa Kigali uba ikigo cy’ingenzi gifata ibyemezo kuri uyu Mujyi wose hamwe n’inzego z’uturere zigafasha mu ishyirwa mu bikorwa.
Mu mwaka wa 2019 , Rubingisa Pudence yatorewe kuyobora Umujyi wa Kigali muri manda y’imyaka itanu, aho yungirijwe na Dr Nsabimana Erneste ushinzwe Imiturire n’Ibikorwa remezo na Umutoni Gatsinzi Nadine ushinzwe imibereho myiza n’ubukungu.
Mu mwaka wa 2020 ,Umwari Pauline yagizwe umuyobozi nshingwabikorwa w’akarere ka Gasabo , Umutesi Solange agirwa umuyobozi nshingwabikorwa w’akarere ka Kicukiro mu gihe Ngabonziza Emmy yagizwe umuyobizi nshingwabikorwa w’akarere ka Nyarugenge muri Manda y’imyaka itanu.
Tugiye kureba muri aba bayobozi muri Manda y’imyaka itanu abakiri mu nshingano za Leta n’aho baherereye n’ibyo bari gukora.
1.Ngabonziza Emmy: Wayoboye Akarere ka Nyarugenge, mu mwaka wa 2024 yari arangije manda y’imyaka itanu ku buyobozi bw’akarere ka Nyarugenge ntiyongezwa indi manda , nta kandi kazi yabonye ko muri Leta ,ubu yashinze ikigo cy’ubujyanama mu ibarura mari n’imisoro (accounting firms and business advisers,)
2.Umwari Pauline: Wayoboye Akarere ka Gasabo, na we mu mwaka wa 2024 yarangije manda ntiyongezwa indi, ubu yashinze ikigo cy’amategeko.
3.Umutesi Solange: Yayoboye Akarere ka Kicukiro. We ntiyarangije manda kuko yahagaritswe mu nshingano Werurwe 2023,Ubu na we asigaye yikorera, twagerageje kuvugana na we ariko ntibyadukundira.
4.Dr Nsabimana Erneste: Yabaye umuyobozi w’umujyi wa Kigali wungirije ushinzwe Imiturire n’Ibikorwa remezo, aza kugirwa Umuyobozi Mukuru w’Urwego Ngenzuramikorere (RURA), umwanya yamazeho igihe gito ahita agirwa Minisitiri w’Ibikorwa remezo , Umwanya yaje gukurwaho mu kwezi kwa 9/2023 , kugeza ubu nta kandi kazi ka leta arahabwa. Uyu Dr Nsanzimana Ernest yashinze ikigo cy’ubujyanama mu bwubatsi (consultancy in construction ).
5.Mpabwanamaguru Merard: Dr Mérard Mpabwanamaguru wari Umuyobozi w’Umujyi wa Kigali Wungirije ushinzwe Imiturire n’Ibikorwa remezo kuva mu mwaka wa 2021 kugeza 2023, uyu na we ntiyarangije manda kuko yakuwe mu nshingano, ntabwo yongeye guhabwa umwanya mu nshingano z’ubuyobozi. Kuri ubu ni umwarimu muri Kamunuza, akaba ari umujyanama mu mishinga itandukanye ijyanye n’imitunganyirize y’imijyi no kurengera ibidukikije kuko nibyo yize.
NTAMBARA Garleon
RADIOTV10
