Abayobozi mu nzego bwite no mu z’umutekano mu Ntara ya Kivu ya Rugurumu bice bigenzurwa n’Ihuriro AFC/M23 bitabiriye umuhango wo gushyingura mu cyubahiro inzirakarengane z’abasivile zaburiye ubuzima mu bitero bya Drone byagabwe i Masisi n’abarimo FARDC.
Uyu muhango wabaye kuri uyu wa Kane tariki 08 Mutarama 2026, mu Mujyi wa Goma mu Ntara ya Kivu ya Ruguru, ahasanzwe hari icyicaro gikuru cy’ubuyobozi bwa AFC/M23.
Uyu muhango witabiriwe n’abayobozi bo hejuru mu nzego bwite, barimo Umuhuzabikorwa wa AFC, Corneille Nangaa, na Guverineri W’Intara ya Kivu ya Ruguru ndetse n’abamwungirije, kimwe n’abayobozi mu nzego z’Igisirikare cya AFC/M23, barimo Umuvugizi wacyo, Col Willy Ngoma.
Umuvugizi wa AFC/M23 mu bya Politiki, Lawrence Kanyuka, yavuze ko umunsi nk’uyu bashyingura mu cyubahiro izi nzirakarengane, ari n’umwanya wo kubaha icyubahiro.
Yagize ati “Uyu munsi turaha agaciro inzirakarengane z’abasivile zahitanywe n’ubwicanyi bw’ibitero byateguwe bikanakorwa buhumyi n’abarwanyi b’abahuzamugambi b’ubutegetsi bw’imenamaraso bwa Kinshasa.”
Kanyuka yakomeje agira ati “Turunamira n’akababaro abahitanywe n’ibitero, tunifatanya byimazeyo n’imiryango yabuze ababo iri mu kababaro.”
Umuvugizi wa AFC/M23 avuga kandi ko ibikorwa nk’ibi bigize ibyaha biri gukorwa n’uruhande bahanganye, bitazibagirana na rimwe, kandi ko iri Huriro rizakomeza guhagurukira kubirwanya.
Ati “AFC/M23 irashimangira ko izakomeza kurangwa n’ubwitange budatezuka mu kurinda abaturage no kurengera uburenganzira bwabo bw’ibanze bwo kubaho, umutekano, n’agaciro k’ikiremwamuntu.”
Iri Huriro kandi ryibukije umuryango mpuzamahanga ko uruhande bahanganye rugizwe n’igisirikare cya Leta ya Repubulika Iharanira Demokarasi ya Congo, n’abagifasha barimo igisirikare cy’u Burundi n’imitwe nka FDLR, na Wazalendo, ko rukomeje kurenga ku gahenge ko guhagarika imirwano kemejwe.
RADIOTV10
