Ikipe ya FC Barcelona yatwaye igikombe kiruta ibindi muri Spain (Spanish Super Cup cyangwa Supercopa de España) nyuma yo gutsinda Real Madrid ibitego 3-2.
Ni umukino wa nyuma wabereye mu mujyi wa Jeddah muri Saudi Arabia, dore ko iki gihugu kuva 2019 gifitanye amasezerano n’ishyirahamwe ry’umupira w’amaguru muri Spain ko iri rushanwa rizajya rihabera kugeza muri 2029.
Ikipe ya Barcelona yatsindiwe n’Umunya-Brazil Raphinha watsinze ibitego 2(wanabaye Umukinnyi w’irushanwa), ikindi gitsindwa na Lewandowski; mu gihe 2 bya Real Madrid byinjijwe na Vinicius Junior wari umaze imikino 17 yikurikiranya atabona izamu na Gonzalo Garcia.
Kuva Federasiyo ya Spain yagirana amasezerano n’igihugu cya Saudi Arabia yo kwakira iri rushanwa mu rwego rw’ubucuruzi, hitabira amakipe 4 ari yo, iyatwaye shampiyona n’iyabaye iya 2, ndetse n’iyatwaye igikombe cy’igihugu bo bita icy’Umwami ndetse n’iyabaye iya 2.
Ikipe yatwaye shampiyona, itangira ikina n’iyabaye iya 2 mu gikombe cy’umwami, hanyuma iyabaye iya 2 muri shampiyona igahura n’iyatwaye icy’umwami hanyuma abatsinze bagahurira ku mukino wa nyuma. Kuri iyi nshuro, Barcelona yakuyemo Atletic Club, Real Madrid yo isezerera Atletico Madrid.
Real Madrid, yatangiye uyu mukino idafite Kylian Mbappé kubera imvune y’ivi aheruka kugira byanatumye asiba umukino wa Atletico Madrid, gusa yaje kwinjira ku munota wa 73.
Ikipe ya Barcelona yasoje umukino ituzuye kubera ikarita y’umutuku yeretswe Frank De Jong ku ikosa yari akoreye Kylian Mbappé, gusa ntibyatumye itegukana igikombe n’ubundi yari yatwaye umwaka ushize.
Barcelona, imaze iminsi ishobora Real Madrid, dore ko mu mikino 6 yikurikiranya iheruka kubahuza, Barca yatsinzemo 5 Real Madrid itsinda 1, muri yo 5 harimo n’uwo Barcelona yanyagiyemo Real Madrid ibitego 5-2 ku mukino wa nyuma w’irushanwa nk’ir8 ry’umwaka ushize.
Amateka agaragaza ko iri rushanwa rya Supercopa de España, ikipe ya Barcelona ari yo irifite inshuro nyinshi kurusha andi makipe ya Spain, dore ko imaze gutwara ibikombe 16 mu myaka 44 rimaze gukinwa mu gihe Real Madrid ifite ibikombe 13.
Jean Claude HITIMANA
RADIOTV10
