Révérien Ndikuriyo, Umunyamabanga Mukuru w’Ishyaka CNDD-FDD riri ku butegetsi mu Burundi, ari i Kampala muri Uganda, ku butumire bwa mugenzi we, uyobora Ishyaka rya NRM riri ku butegetsi muri Uganda, ahateganyijwe kuba ibiganiro hagati y’impande zombi.
Révérien Ndikuriyo ari i Kampala muri Uganda kuva kuri iki Cyumweru tariki 10 Gisurasi 2026 nk’uko byatangajwe n’ubuyobozi bw’iri shyaka rya CNDD-FDD.
Ubuyobozi bw’iri shyaka riri ku butegetsi mu Burundi, buvuga ko “Révérien Ndikuriyo yageze i Kampala muri Uganda kuri uyu wa 10 Gicurasi 2026 ku butumire bwa mugenzi we wa NRM, ishyaka riri ku butegetsi.”
Ubuyobozi bw’iri Shyaka ry’i Gitega mu Burundi, bukomeza buvuga ko muri uru ruzinduko “hateganyijwe kubaho guhura n’abayobozi banyuranye ndetse n’ibiganiro binyuranye, bigamije guteza imbere umubano n’ubucuti n’imikoranire hagati y’amashyaka yombi.”
CNDD-FDD kandi ivuga ko uyu Munyamabanga Mukuru wayo, azitabira ibirori by’irahira rya Perezida Yoweri Kaguta Museveni bizaba kuri uyu wa Kabiri tariki 12 Gicurasi 2026.
Ishyaka NRM riri mu mashyaka y’impinduramatwara akuze muri aka karere, kuko riri ku butegetsi muri Uganda, kuva mu 1986, mu gihe irya CNDD-FDD ryo riri ku butegetsi mu Burundi kuva muri 2005.
RADIOTV10
