Umugaba w’Ingabo zirwanira ku butaka muri RDF, Maj Gen Vincent Nyakarundi yasuye abasirikare b’u Rwanda bari mu butumwa bw’Umuryango w’Abibumbye muri Repubulika ya Centrafrique, abagezaho ubutumwa bagenewe n’Ubuyobozi bwa RDF anabasobanurira uko umutekano uhagaze mu Rwanda no mu karere ruherereyemo.
Aba basirikare bari mu butumwa bwa LONI bwo kubungabunga amahoro muri Repubulika ya Santarafurika (MINUSCA), basuwe na Maj Gen Nyakarundi, ni abagize Batayo ya mbere (RWABATT-1) ikorera mu kigo cya Socatel M’Poko giherereye mu Mujyi wa Bangui.
Maj Gen Vincent NYAKARUNDI yabagejejeho ubutumwa bubashimira bwaturutse ku buyobozi bukuru bwa RDF, anabashimira ubunyamwuga, imyitwarire myiza n’ubwitange bagaragaza mu gusohoza inshingano zabo zo kubungabunga amahoro.
Yanasobanuriye abasirikare uko umutekano uhagaze mu Rwanda no mu karere muri rusange.
Umugaba w’Ingabo zirwanira ku butaka ari muri Repubulika ya Santarafurika mu ruzinduko rw’akazi rugamije gushimangira ubufatanye bwa gisirikare busanzwe hagati y’ibihugu byombi, u Rwanda na Santarafurika.
Hamwe n’ intumwa ayoboye kandi bazanasura izindi Ngabo z’u Rwanda ziri mu butumwa bw’Umuryango w’Abibumbye ndetse n’aboherejweyo hashingiwe ku masezerano y’ubufatanye hagati y’ibihugu byombi.
RADIOTV10
