Uhagarariye Inyungu za Gisirikare (Defence Attache) muri Ambasade y’u Rwanda mu Burusiya, yasuye ishuri ry’Igisirikare ryigisha amasomo y’Ingabo zirwanira mu kirere ryo muri iki Gihugu rya Gagarin Air Force Academy Voronezh.
Ni igikorwa cyabaye kuri uyu wa Kane tariki 09 Nyakanga 2026 nk’uko byatangajwe n’Ibiro bya Ambasade y’u Rwanda mu Burusiya.
Ambasade y’u Rwanda mu Burusiya, yatangaje ko “Uhagarariye Inyungu za Gisirikare muri Ambasade ya Repubulika y’u Rwanda i Moscow, Col AB Mpagaze yasuye ikigo cy’uburezi mu bya gisirikare n’ubumenyi mu by’ingabo zo mu kirere Gagarin Air force Academy Voronezh.”
Ambasade y’u Rwanda mu Burusiya ikomeza ivuga ko “Intego y’uru ruzinduko yari ugukomeza gushimangira ubufatanye hagati y’impande zombi mu kubaka ubushobozi no gukurikirana abanyeshuri b’Ingabo z’u Rwanda bari guhererwa amahugurwa y’ubunyamwuga muri iri shuri.”
Igihugu cy’u Rwanda n’icy’u Burusiya bisanzwe bifitanye ubufatanye n’imikoranire bihamye mu bya gisirikare bishingiye ku masezerano y’ubutwererane no kongerera ubushobozi.
Bimwe mu bikorwa biranga yi mikoranire n’ubufatanye mu bya gisirikare, birimo amahugurwa ya gisirikare, ubufatanye mu bya tekiniki, ndetse n’ibijyanye n’ibikoresho bya gisirikare.
Muri Gicurasi uyu mwaka i Kigali mu Rwanda, hateraniye inama ya Komisiyo ihuriweho ishinzwe ubufatanye mu bya gisirikare hagati y’u Rwanda n’u Burusiya, yasoje impande zombi zisuzumiye hamwe uko zashimangira ubufatanye mu bya gisirikare, binyuze mu mikoranire ifatika.
Icyo gihe, Ubuyobozi Bukuru bwa RDF, bwavuze ko iyi nama ngarukamwaka ari urubuga rwo gusuzumiramo aho ubufatanye mu bya gisirikare hagati y’u Rwanda n’u Burusiya bugeze, ndetse no kurebera hamwe indi mikoranire mishya y’ubufatanye.
RADIOTV10