Muri Teritwari ya Walikale, mu Ntara ya Kivu ya Ruguru, abantu bane bapfuye nyuma yo gufatwa n’uburwayi bakajyanwa kwa muganga, bwatewe n’inyama z’inkende bari bariye.
Umuganga uyobora by’agateganyo agace k’ubuzima ka Pinga, Dr. Théophile Muka, yavuze ko abo bantu barwaye nyuma yo kurya inyama z’inkende ku wa Gatandatu. Abandi bantu bari basangiye na bo izo nyama na bo bararwaye bikomeye.
Dr Muka yavuze ko ari ubwa mbere muri Zone de Santé ya Pinga habaye ikibazo nk’iki.
Nyuma y’urupfu rw’aba bantu, inzego z’ubuzima zohereje itsinda ry’abaganga n’abashinzwe ubuzima i Munsanga kugira ngo risuzume abarwaye ndetse rikore iperereza ku cyaba cyateye ubu burozi.
Biteganyijwe ko abarwayi bakirwaye bikomeye bazafatwaho ibipimo bizoherezwa muri laboratwari kugira ngo bisuzumwe. Ibi bizafasha kumenya inkomoko nyayo y’uburozi no kugenzura niba koko bwatewe no kurya inyama z’inkende.
Dr. Théophile Muka yagize ati “Twohereje itsinda ry’abakozi b’ubuzima aho byabereye kugira ngo bafate ibipimo ku bantu bakirwaye bikomeye, hanyuma bibanze muri laboratwari.”
Mu gihe hagitegerejwe ibisubizo by’ibipimo, inzego z’ubuzima zikomeje gukurikirana uko ibintu bimeze i Munsanga.
Uko inyama z’inkende zatunganyijwe n’uko zariye, ndetse n’uko zaba zarandujwe n’ikintu cyateye uburozi, biracyakorerwa iperereza. Ibisubizo bya laboratwari ni byo bitegerejweho kugaragaza mu buryo bwa gihanga icyateye ubu burozi no gufasha inzego z’ubuzima gufata ingamba zo gukumira ko hari abandi bashobora kugira ikibazo nk’iki.