Leta Zunze Ubumwe za Amerika zagabye ibitero bya gisirikare ku birindiro bya Iran biri muri Hormuz, ivuga ko byari ibitero by’ubwirinzi bigamije kurinda ingabo n’ibikoresho byayo nyuma y’uko hagaragaye iterabwoba ry’intwaro zirasa indege.
Ibi bibaye mu gihe ibiganiro bigamije guhagarika intambara bikomeje, ariko impande zombi zikaba zitarumvikana ku masezerano azatuma imirwano ihagarara.
Amakuru yatangajwe na Associated Press, kuri uyu wa 03 Ugushyingo 2026, avuga ko igisirikare cya Amerika cyagabye ibyo bitero nyuma y’uko umutungo wacyo wa gisirikare ugaragarijwe ibyago by’ibitero bishobora kugabwa na Iran. Washington yabyise ibitero bike by’ubwirinzi, mu gihe Tehran ikomeje kwamagana ibikorwa bya gisirikare bya Amerika mu karere kayo.
Visi Perezida wa Amerika, JD Vance, yavuze ko ibiganiro bitaziguye hagati ya Washington na Tehran byateye intambwe igaragara. Icyakora, Iran ivuga ko nta masezerano ashobora kugerwaho mu gihe Amerika itarahagarika igotwa ryayo mu mazi kandi itarasubiza ku byo isaba.
Umuvugizi w’igisirikare cya Iran, Mohammad Akraminia, yaburiye Amerika ko nihongera kugaba ibitero kuri icyo gihugu, igisubizo kizaba gikomeye kandi kigere no mu bindi bice birenze Aziya y’Iburengerazuba. Yavuze ko ingabo za Iran zikomeje gutegura uburyo bwo gusubiza ibitero bishobora kugabwa ku birindiro, ibikoresho n’inyungu za Amerika aho byaba biri hose mu bushobozi bwazo.
Perezida wa Amerika, Donald Trump, na we yavuze ko Igihugu cye gishobora kongera kwibasira ikigo cyo munsi y’ubutaka muri Iran kizwi nka Pickaxe Mountain, gikekwa ko gifitanye isano na gahunda ya kirimbuzi y’icyo Gihugu.
Hagati aho, amakuru y’iturika yumvikanye ku kirwa cya Qeshm no mu mujyi wa Bandar Lengeh yakomeje kongera impungenge z’uko imirwano ishobora kongera gufata indi ntera.
RADIOTV10