Amakipe atandukanye yo muri Espagne no mu bindi bihugu byo ku Mugabane w’u Burayi akomeje kugaragaza agahinda n’akababaro nyuma y’urupfu rw’umukinnyi w’umupira w’amaguru, Jesús de Miguel, witabye Imana nyuma yo kugongana n’umunyezamu mu mukino wa shampiyona y’icyiciro cya kabiri muri Espagne.
Uyu mukinnyi ukomoka muri Espagne yakiniraga ikipe ya CD Tenerife, akaba yagize impanuka ubwo bakinaga na Andorra mu mukino wabaye ku wa Mbere. Yagonganye n’umunyezamu wa Andorra, Jesús Owono, wari ugerageje gukiza umupira uri hagati mu kibuga.
Nyuma yo kugongana, De Miguel yahise agwa hasi afashe mu gatuza, aza kurambarara ku kibuga atanyeganyega. Abakinnyi b’amakipe yombi bagaragaje agahinda gakomeye, mu gihe abaganga bahise batangira kumwitaho.
Umusifuzi yahise yereka Owono ikarita itukura, amwirukana mu kibuga kubera uruhare yagize muri iyo mpanuka. Uyu munyezamu wari umaze gutangira kuva mu kibuga, agarutse yihuta kureba uko mugenzi we ameze amaze kubona uburemere bw’ibyamubayeho.
Umukino wahise uhagarikwa habura iminota mike ngo urangire, kugira ngo De Miguel ahabwe ubutabazi bwihuse. Yahise ajyanwa mu bitaro, aho amakuru yatangajwe mbere yavugaga ko yari ameze neza ugereranyije n’uburemere bw’imvune yari yagize.
Gusa uko amasaha yagendaga ashira, ubuzima bwe bwakomeje kuzamba, maze mu gitondo cyo ku wa Kabiri tariki ya 3 Ugushyingo 2026, ikipe ya CD Tenerife itangaza inkuru y’incamugongo y’urupfu rwe.
Mu butumwa iyi kipe yashyize hanze, yagaragaje ko ibabajwe bikomeye n’iki gihombo, ivuga ko nta magambo ashobora gusobanura agahinda yatewe n’urupfu rw’uyu mukinnyi.
Yagize iti: “Dufite agahinda kenshi, twabuze icyo tuvuga kandi biratugora kwemera ko ibi ari ukuri. Nta magambo yo guhumuriza ahari, nta n’ikintu na kimwe gishobora kugabanya aka gahinda katuremereye. Twifatanyije n’umuryango we washegeshwe n’uru rupfu, inshuti ze n’abakunzi bose ba Tenerife muri ibi bihe bikomeye.”
Ikipe ya Andorra na yo yifatanyije n’umuryango wa De Miguel, bagenzi be bakinana ndetse na CD Tenerife, itangaza ko ibabajwe cyane n’aya makuru.
Yagize iti: “Dufite agahinda kenshi kandi imitima yacu yaravunitse. Twoherereje ubutumwa bwacu bwo kwihanganisha umuryango wa Jesús de Miguel, bagenzi be bakinana, inshuti ze ndetse na CD Tenerife.”
Si ayo makipe yombi gusa yagaragaje akababaro, kuko n’andi makipe akomeye ku Mugabane w’u Burayi yagaragaje ko ababajwe n’urupfu rw’uyu mukinnyi.
Ikipe ya Real Madrid yatangaje ko yihanganishije umuryango n’inshuti za De Miguel, inagaragaza ko ibari hafi muri ibi bihe bikomeye.
Ku ruhande rwa FC Barcelona, na yo yagaragaje agahinda yatewe n’aya makuru, ivuga ko ibabajwe cyane n’uru rupfu rwabaye mu buryo butunguranye.
Urupfu rwa Jesús de Miguel rwashenguye abakunzi b’umupira w’amaguru, cyane ko rwabaye mu gihe yari mu kibuga akora umwuga yakundaga.
RADIOTV10