Mu itangazo ryashyizwe ahagaragara kuri uyu wa Kabiri tariki 03 Ugushyingo 2026, ubuyobozi bwa Makerere University bwavuze ko bwababajwe n’ibyabaye mu birori byiswe Freshers’ Ball, byabaye ku wa Gatandatu tariki 31 Ukwakira 2026, kuri iyi kaminuza.
Iri tangazo rivuga ko amashusho y’uwahoze ari umunyeshuri muri iyi kaminuza yazamuye impaka ndende ku mbuga nkoranyambaga.
Ubuyobozi bwa Makerere bwagize buti “Kaminuza ya Makerere yababajwe n’ibyabaye birimo imyitwarire y’uwahoze ari umunyeshuri wayo mu birori bya Freshers’ Ball byabaye ku wa Gatandatu tariki 31 Ukwakira 2026, ku butaka bwa kaminuza, bikaza gukurura abantu benshi no guteza impaka.”
Iyi kaminuza yasobanuye ko ibi birori bisanzwe byitabirwa n’abantu batandukanye, barimo abanyeshuri bashya, abayirangijemo ndetse n’abandi baturage.
Yongeyeho ko itemera imyitwarire iyo ari yo yose inyuranyije n’indangagaciro, amahame n’imyitwarire myiza itegerejwe ku bagize umuryango wa kaminuza.
Mu rwego rwo gukumira ko ibyabaye byazongera, ubuyobozi bwatangaje ko bwatangiye isuzuma ryimbitse ry’uburyo umutekano ucungwa n’uko ibikorwa bitandukanye by’imyidagaduro byemewe na kaminuza bitegurwa.
Iri tangazo rigira riti “Twatangiye isuzuma ryihuse kandi ryimbitse ry’amabwiriza agenga umutekano n’imitegurire y’ibirori by’imyidagaduro byemewe na kaminuza, kugira ngo hirindwe ko ibibazo nk’ibi byongera kubaho.”
Makerere University yanavuze ko yamenye ubusabe bw’umuryango w’uwagaragaye muri ayo mashusho, wasabye abantu kureka gukomeza kuyasakaza no kuyakwirakwiza.
RADIOTV10