Ibiro bya Minisitiri w’Intebe wa Israel, byashyize hanze ifoto ya Benjamin Netanyahu ari kuri telefone, atanga amabwiriza yo kwica bamwe mu bayobozi mu nzego nkuru za Iran.
Ni ifoto yashyizwe hanze n’Ibiro bya Minisitiri w’Intebe wa Israel mu gitondo cyo kuri uyu wa Kabiri, mbere yuko Igisirikare cy’iki Gihugu gitangaza ko kishe Ali Larijani wari umuyobozi w’Inama Nkuru y’Umutekano w’Igihugu muri Iran.
Ubutumwa buherekeje iyi foto, Ibiro bya Minisitiri w’Intebe wa Israel, bugira buti “Ifoto: Minisitiri w’Intebe Benjamin Netanyahu atenga itegeko ryo kwica abayobozi bakuru ba leta ya Iran.”
Nyuma yuko hagiye hanze iyi foto, Minisitiri w’Ingabo wa Israel, Israel Katz yashyize hanze itangazo yisomeye, yemeza ko Igisirikare cy’iki Gihugu kivuganye uriya wari Umuyobozi Mukuru w’Inama y’Umutekano ya Iran.
Uyu wari umwe mu bayobozi bakomeye mu nzego z’umutekano muri Iran, kandi yishwe hamwe n’Umugaba Mukuru w’Igisirikare cya Basij Gholamreza Soleimani.
RADIOTV10
