Nyuma y’amezi abiri yegukanye Igikombe cya Afurika cya 2025 cyabereye muri Morocco, ikipe y’Igihugu ya Senegal yacyambuwe gihabwa iya Morocco nyuma y’ubujurire yari yagejeje muri CAF.
Tariki 18 Mutarama 2026, nibwo hari habaye umukino wa nyuma w’igikombe cya Afurika maze urangira Senegal itsinze Morocco igitego 1-0 cya Pape Gueye, ndetse Senegal inahabwa igikombe cyayo yari itwaye ku nshuro ya 2.
Icyakora muri uwo mukino, habayemo amahane yanatumye ikipe ya Senegal yikura mu kibuga bitewe nuko Umusifuzi yari yemeje Penalty ya Morocco mu minota y’inyongera ngo iminota isanzwe y’umukino irangire, gusa abakinnyi ba Senegal banze kuyemera banava mu kibuga basubira mu rwambariro ahanini bigizwemo uruhare n’Umutoza wabo PAPE THIAW.
Nyuma y’iminota 17 habuze umwanzuro ufatwa, Sadio Mané wa Senegal yasabye abakinnyi ko bagaruka mu kibuga bakemera penalty igaterwa, ni nako byagenze icyakora Brahim Diaz ayiteye arayihusha umukino urangira 0-0, bagiye mu minota 30 y’inyongera ni bwo Senegal yatsindaga 1-0 ikanatwara igikombe.
Morocco, ntiyigeze inyurwa n’ibi, nyuma yatanze ikirego mu mpuzamashyirahamwe y’umupira w’amaguru muri Afurika(CAF), maze akanama gashinzwe ubujurire ka CAF kaza kwanzura ko Senegal yishe ingingo ya 82 igenga amarushanwa ya CAF, bityo igomba guhanwa hagendewe ku ngingo 84 maze igaterwa mpaga ingana n’ibitego 3-0, ndetse ikanamburwa igikombe yatwaye.
Hari amakuru avuga ko Senegal nyuma yo kumenya ibi, na yo iri gutegura ikindi kirego igomba kujyana mu rukiko nkemurampaka rwa siporo TAS.
Iki gikombe gihawe Morocco, nikigumana kizaba kibaye icya kabiri itwaye mu mateka yayo, dore ko icyo yaherukaga gutwara hari mu 1976.
Jean Claude HITIMANA
RADIOTV10
